Архидалтын эсрэг тэмцэл бол хүмүүнлэг тэмцэл байх ёстой. Хүний нэр төр, эрхэм чанар, нууцлалтыг хадгалж хүний эрхийг хүндэтгэсэн хууль эрх зүйн орчинг бүрдүүлж, нийгмийн үйлчилгээг хэрэгжүүлж байж үр дүнгээ өгч олон хүнийг хамарч чадна. Архинд орсон хүн ганцаараа энэ донтох өвчнөөс гарч чадахгүй. Түүнд гэр бүл ойр дотны хүмүүс, эмчийн тусламж дэмжлэг хэрэгтэй. Гэхдээ тэд бүх хүн түүний асуудлыг мэдээд байхыг хүсдэггүй. Тэд тодорхой хүрээнд нууцлалтыг хадгалахыг хүсдэг. Ийм нууцлалтын тойргийг бий болгож байж амжилтанд хүрдэг гэдгийн оролцогчид хэллээ.

 

Монгол улсад архины асуудалгүй гэр бүл байхгүй болсон тухай оролцогчид сэтгэл зовьнин ярьж байна. Он гарсаар 26000 хүн Улаанбаатар хотод эрүүлжүүлэгдсэн байна. Өчигдөр оройн байдлаар нийслэлийн хэмжээнд 145 хүн эрүүлжүүлэгдсэн тухай албан мэдээ байна.

 

Иймд төр ба төрийн бус байгууллагууд, донор, хандивлагчид, хувийн хэвшлийнхэн бүгд нэгдэж нийгэм, хамт олонд суурилсан эрүүл мэнд, боловсролын цогц хөтөлбөрийг хэрэгжүүлж байж согтууруулах ундаа, мансууруулах бодист донтох эмгэгийг бууруулж чадна хэмээн оролцогчид үзлээ.    

Мөн архидалтын эсрэг ажилладаг ТББ-ууд зохион байгуулалтанд орж сүлжээ байгуулан ажиллах төлөвлөгөөтэй байгаагаа илэрхийллээ.

ЕТГ-аас санаачлан зохион байгуулсан энэхүү уулзалтыг цаашид үргэлжлүүлж төрийн байгууллагууд болон донор байгууллагуудтай цуврал уулзалт хийж хамтын үйл ажиллагааг сайжруулах шаардлагатай байгааг хэлж байсан юм.