Монгол Улсын Ерөнхийлөгч “Монголын тамирчдын өдөр, олон улсын олимпийн өдөр”-ийг тохиолдуулан уриалга гаргалаа
Өнөөдөр “Монголын тамирчдын өдөр, олон улсын олимпийн өдөр” билээ. Энэ өдрийг тохиолдуулан Монгол Улсын Засгийн газрын хэрэгжүүлэгч агентлаг-Биеийн тамир спортын газар, Монголын Үндэсний Олимпийн Хорооноос Д.Сүхбаатарын талбайд нэгдсэн арга хэмжээ, өдөрлөгийг зохион байгуулж байна.
Тус арга хэмжээнд УИХ-ын гишүүн, Эрүүл мэндийн сайд С.Ламбаа, УИХ-ын гишүүн, ХЗБХ-ны дарга Б.Бат-Эрдэнэ, Монгол Улсын Ерөнхийлөгчийн Зөвлөх А.Ганбаатар, БТСГ-ын дарга Ч.Наранбаатар, МҮОХ-ны Ерөнхийлөгч Д.Загдсүрэн нар болон тамирчид, дасгалжуулагчид, спорт сонирхогч олон нийтийн төлөөлөл оролцлоо.
Уг арга хэмжээний нээлтийн үеэр Монгол Улсын Ерөнхийлөгчийн, нийт тамирчид, дасгалжуулагчид, ард иргэддээ хандан гаргасан уриалгыг Ерөнхийлөгчийн зөвлөх А.Ганбаатар уншиж танилцуулан БТСГ-ын дарга Ч.Наранбаатарт гардуулан өгсөн юм.
Уриалгад, “...Лондон хотноо 2012 онд болох зуны Олимпийн ХХХ, Паралимпийн ХIV их наадамд таван тивийн шилдэг тамирчид, түүний дотроос Монголын баг тамирчид,дасгалжуулагчид онцгой эрчимтэй бэлтгэж байна”
Өмнөх Олимпод гаргасан амжилтаа ахиулахын төлөө бие, сэтгэлээ дайчилж, бэлтгэл сургуулилтаа шинжлэх ухааны үндэслэлтэй уйгагүй базааж, тамирчны урт хугацааны байнгын дасгалжилт, туршлагажилт, сэтгэл зүйн бэлтгэлийг монгол хүний зориг тэвчээр, бяр чадал, авхаалж самбаагаар олон түмний хүссэн амжилтанд хүрнэ гэдэгт Төрийн тэргүүн би ард түмнийхээ нэгэн адил найдаж байна” хэмээн онцолсон байна.
Мөн тус арга арга хэмжээний үеэр Монгол Улсын Ерөнхийлөгчийн 53 тоот Зарлигийн дагуу бие бялдрын хөгжил, чийрэгжилтийн түвшин тогтоох сорилгыг орон даяар амжилттай сайн зохион байгуулсан байгууллага, биеийн тамирын арга зүйч нарт Монгол Улсын Ерөнхийлөгчийн нэрэмжит дурсгалын зүйл гардуулсан бөгөөд шинээр Үндэсний шигшээ багийн гишүүнээр элсэж байгаа тамирчид тангараг өргөсөн юм.
Энэхүү нэгдсэн арга хэмжээний үеэр тамирчдын үзүүлэх тоглолтууд, мөн авьяаслаг тамирчдын “Гала” тоглолт зохиогдох юм.
Монгол Улсын Ерөнхийлөгч “Монголын тамирчдын өдөр, олон улсын олимпийн өдөр”-ийг тохиолдуулан уриалга гаргалаа
