Ерөнхийлөгчийн зөвлөх Ч.Сосормаа нийслэлийн 3-р амаржих газрын дарга Д.Бат-Очиртой уулзлаа
Монгол Улсын Ерөнхийлөгчийн Хүний эрх, Иргэний оролцооны бодлогын зөвлөх Ч.Сосормаа Гуравдугаар амаржих газрын дарга Д.Бат-Очир, эрүүл мэндийн мэдээллийн статистикч, хүний нөөцийн менежер Н.Алтантуяа нарыг хүлээн авч уулзлаа.
Уулзалтаар, нийслэлийн Гуравдугаар амаржих газрын өнөөгийн нөхцөл байдал, эхчүүд, хүүхдүүдийн эрүүл мэндийн байдал зэрэг тулгамдаж буй асуудлуудын талаар санал солилцов.
Гуравдугаар амаржих газрын дарга Д.Бат-Очир хэлэхдээ, тус амаржих газрын барилга нь 51 жилийн өмнө баригдсан, зориулалтын бус байр, өрөө тасалгааны хүрэлцээ, хангамж муу, эрүүл ахуйн наад захын шаардлага хангаагүй орчинд үйл ажиллагаа явуулж байгааг онцолж байв.
Түүнчлэн эмч, эмнэлэгийн ажилтан дутагдалтай бөгөөд амаржих газрын хэмжээнд хүний нөөцийн хуваарилалтын бодлого алдагдсан, нярайн болон мэдээгүйжүүлэлт- эрчимт эмчилгээний эмч, сувилагч тус бүр 4 ажиллаж байгаа нь ажилчдын ачаалал өндөр, амралт бага, цалингийн нэмэгдэл бага байдаг зэрэг бэрхшээлтэй асуудлууд их байгаа талаар хэлж байлаа.
Өнөөдрийн байдлаар нэг эх, нярайд стандартаар 15м2 талбай ноогдох ёстой бол 2.8 - 3.2м2 буюу 5 дахин бага талбай ноогдож байна. Хэдий ажлын ачаалал өндөр, нөхцөл байдал ийм байгаа боловч эхийн эндэгдэл гаргахгүй ажиллаж байгаагаа хэлэв.
Цаашид эмэгтэйчүүд болон жирэмсэн эхчүүдээ эрүүл хүүхэд төрүүлэхэд нь туслах зорилгоор эмэгтэйчүүдийн тасаг нээж ажиллуулах шаардлагатай байгааг онцолж байлаа.
Уулзалтын төгсгөлд шаардлагатай байгаа сүүлийн үеийн тоног төхөөрөмж авах асуудлыг гадны донор байгууллагуудад санал тавихаар тохиролцлоо.
Ерөнхийлөгчийн зөвлөх Ч.Сосормаа нийслэлийн 3-р амаржих газрын дарга Д.Бат-Очиртой уулзлаа
