Монгол Улсын Ерөнхийлөгчийн Тамгын газрын дарга Д.Баттулга Саудын Арабын Вант Улсын төлөөлөгчидтэй уулзлаа
Монгол Улсын Ерөнхийлөгчийн Тамгын газрын дарга Д.Баттулга 2010 оны 06 дугаар сарын 29 ны өдөр буюу өчигдөр Саудын Арабын Вант Улсын Газрын тос, Эрдэс баялгийн сайд Али Аль-Найми Газрын тос, Эрдэс баялгийн яамны Дарга Али Ал-Твайрки Газрын тос, Эрдэс баялгийн дэд сайд Султан Шаули Саудын Арабаас Бээжинд суугаа Элчин Сайд Яаяа Алзайд нартай уулзан, хоёр орны газрын тосны салбар болон дипломат харилцааг өргөжүүлэх талаар ярилцлаа.
Уулзалтад Монгол Улсын ЭБЭХ-ний сайд Д.Зоригт, Ерөнхийлөгчийн ахлах зөвлөх П.Цагаан, Ерөнхийлөгчийн Гадаад Бодлогын зөвлөх Л.Пүрэвсүрэн нар оролцлоо.
Монгол Улсын Ерөнхийлөгчийн Тамгын газрын дарга Д.Баттулга хэлэхдээ Монгол Улс өөрөө газрын тосны нөөцтэй тул газрын тосны хараат байдлаас гарах, мөн түүнчлэн газрын тос боловсруулах үйлдвэр барих боломж нөхцөлийн талаар судалж, Саудын Арабтай хамтарч ажиллах сонирхолтой байгаагаа илэрхийлж, хоёр орны хооронд элчин сайдын хэмжээний дипломат харилцаа тогтоосноор энэхүү уулзалтад хэлэлцсэн асуудлууд бодит байдал дээр биелэлээ олох чухал хөшүүрэг болно гэж бодож байна гээд, Монгол Улсын зүгээс Элчин сайдын дурдсан асуудлуудыг ойшоон үзэж, дэмжих болно гэлээ.
Уулзалтын үеэр Газрын тос, Эрдэс баялгийн сайд ноён Али Аль-Найми хэлэхдээ Саудын Арабын хувьд өдөрт 12сая баррель газрын тос үйлдвэрлэх хүчин чадалтай ч одоогоор 8-8.5 сая баррелийг үйлдвэрлэдэг бөгөөд энэхүү хэмжээ нь дэлхийн газрын тосны өдрийн хэрэгцээний 10 хувийг эзэлдэг. Тиймээс тус улс Монгол Улсад газрын тос нийлүүлэх хангалттай нөөцтэй.
Эхний шатанд Монгол Улсын эрдэс баялгийн салбар хариуцсан эрх баригч, мэргэжилтнүүд болон бизнесийн төлөөлөлтэй хамт Саудын Араб руу айлчлал хийн салбар хоорондын туршлага судлах. Үүний үр дүнд Монгол Улсын төлөөлөгч нар Саудын Арабд газрын тосны салбар нь ямар бүтэцтэйгээр яаж ажилладаг бодит байдалтай танилцах боломжтой гэсэн юм.
Газрын тосноос гадна боловсрол, газар тариалан, худалдаа зэрэг өөр олон салбарт хамтран ажиллах боломж бий. Хоёр орны хоорондын эдгээр харилцааг өргөжүүлэх эхний алхам бидний энэхүү уулзалтаар эхэлж байна хэмээн үзэж байгаагаа дурдлаа.
Уулзалтын төгсгөлд Монгол Улсын Ерөнхийлөгчийн Тамгын газрын дарга Д.Баттулга хоёр орны хамтын ажиллагааг өргөжүүлэх тал дээр Монгол Улсын Ерөнхийлөгчийн зүгээс дэмжлэг туслалцаа үзүүлэхэд бэлэн байгааг илэрхийлээд, Монгол Улс болон Саудын Арабын вант улсын харилцааг өргөжүүлэхэд нэн түрүүнд тус хоёр орон хоорондоо шууд харилцдаг болохын чухлыг онцлон тэмдэглэлээ.
Монгол Улсын Ерөнхийлөгчийн Тамгын газрын дарга Д.Баттулга Саудын Арабын Вант Улсын төлөөлөгчидтэй уулзлаа
