Цаазаар авах ялыг халах сэдвээр хэлэлцлээ
Монгол дахь НҮБ-ын суурин төлөөлөгчийн газраас 3 сар тутам хүний эрхийн асуудлаар хэлэлцүүлэг зохион байгуулдаг билээ. Өнгөрсөн 6-р сарын 30-ны өдөр ээлжит хэлэлцүүлэг болж, энэ удаа Цаазаар авах ялыг халах сэдвээр ярилцлаа.
НҮБ, Монгол Улсын Ерөнхийлөгч Ц.Элбэгдоржийн цаазаар авах ялыг түдгэлзүүлж байгаа тухай мэдэгдлийг талархан хүлээж авсан бөгөөд, Монгол улсыг цаазын ялгүй орон болох үйл явцыг дэмжиж байгаа юм.
Хэлэлцүүлгийг НҮБ-ын суурин зохицуулагчийн үүрэг гүйцэтгэгч Хатагтай Рана Фловерс явуулж, НҮБ-ын Хүний эрхийн дээд зөвлөлийн газрын төлөөөлөгч Жеймс Хэнан ирж илтгэл тавилаа. Тэрээр, Цаазаар авах ялыг халж байгаа улс Иргэний болон Улс төрийн эрхийн олон улсын пактын нэмэлт 2-р протоколд нэгдэн орох түүнчлэн дотоодын хуулиндаа цаазаар авах ялыг халах шаардлагатай болохыг зөвлөв.
2010 он гарсаар Ангол улс хуулиасаа цаазаар авах ялын тухай заалтыг авч , уг ялыг халж, ОХУ-ын Дээд Шүүхээс тодорхойгүй хугацаагаар түдгэлзүүлсэн байна.
Уг хэлэлцүүлгийн үеэр Монгол улсын Ерөнхийлөгчийн зөвлөх Г. Ганзориг Монгол Улсын Ерөнхийлөгчийн санаачилсан “Эрүүгийн хуульд нэмэлт өөрчлөлт оруулах тухай” хуулийн төслийн агуулгыг танилцуулав.
Хүний эрхийн үндэсний комисын гишүүн Дашдорж, Монгол улс 2003 онд буюу 7 жилийн өмнө батлагдсан “Хүний эрхийг хангах үндэсний хөтөлбөр”-т Монгол улс цаазаар авах ялын хэргийн төрлийг цөөрүүлэх, хэтдээ ялын төрлөөс хасах чиглэлийг баримтлана гэж заасан нь Монгол улс цаазаар авах ялыг халах бодлогоо тодорхойлсоны нэг илрэл юм гэдгийг цохон дурдлаа.
Мөн “Эмнестий Интернэйшнл” олон улсын байгууллагын удирдах зөвлөлийн дарга Янжмаа энэ асуудлаар олон нийттэй хэрхэн ажиллаж байгаа талаар танилцуулав.
Хэлэлцүүлэгт ХЗДХЯ, ГХЯ болон шүүгч, өмгөөлөгчид, хүний эрхийн төлөө тэмцэгчид болон ТББ-ын төлөөлөл оролцлоо.
Цаазаар авах ялыг халах сэдвээр хэлэлцлээ
