Итгэмжлэх жуух бичгийг хүлээн авав
Өнөөдөр, Монгол Улсын Ерөнхийлөгч Ц.Элбэгдорж манай оронд суухаар тохоон томилогдсон зарим орнуудын Элчин сайдуудын итгэмжлэх жуух бичгийг хүлээн авлаа.
Мароккын Вант Улсаас Монгол Улсад суухаар Онц бөгөөд Бүрэн эрхт Элчин сайд Жафар Али Хаким томилогджээ. Тэрээр Европын Холбоо болон Чад, Нигери зэрэг улсуудад ажиллаж байсан туршлагатай элчин сайд юм. Итгэмжлэх жуух бичгээ өргөн барьсныхаа дараа ноён Жафф Али Хаким хоёр орны харилцааг сайжруулах асуудлаар өөрийн санал бодлоо Ерөнхийлөгчид ярилаа. Олон Улсын байгууллагуудын хамтын ажиллагааны хүрээнд Монгол-Мароккын харилцааг сайжруулах боломж байгааг тэрээр онцолж байлаа. Манай улс Мароккын Вант Улстай 1970 онд дипломат харилцаа тогтоож байжээ.
Мөн энэ өдөр, Бүгд Найрамдах Словак Улсаас Монгол Улсад суух Онц бөгөөд Бүрэн эрхт Элчин сайд Франтишек Длхополчек Монгол Улсын Ерөнхийлөгчид итгэмжлэх жуух бичгээ өргөн барив.
Монгол, Бүгд Найрамдах Словак Улсын хоорондох уламжлалт найрсаг харилцааг улам бүр бэхжүүлэхийн төлөө чармайн ажиллаж, харилцааны шинэ шинэ боломжуудыг эрж хайх болно хэмээн ноён Франтишек Длхополчек хэлэв. Бүгд Найрамдах Словак Улсын ЗГ Монгол Улсыг Хөгжлийн тусламжийн хөтөлбөртөө үргэлжлүүлэн хамруулахаар болсонд талархаж байгаагаа Ерөнхийлөгч илэрхийллээ. Хоёр улсын хооронд өндөр дээд хэмжээний айлчлалыг тогтмолжуулах нь харилцааг өргөжүүлэхэд чухал ач холбогдолтой болохыг харилцан тэмдэглэсэн юм.
Арабын Бүгд Найрамдах Египет Улсаас Монгол Улсад суух Онц бөгөөд Бүрэн эрхт Элчин сайд Ахмед Резк Мухамед Резк мөн итгэмжлэх жуух бичгээ өргөн барив. Сүүлийн жилүүдэд манай хоёр орны хооронд худалдаа эдийн засаг, хөдөө аж ахуй, аялал жуулчлал, боловсрол соёл, байгаль орчны салбарт хамтын ажиллагаа эрчимжиж байгаа билээ. Өмнөх жилүүдэд байгуулсан Засгийн газар хоорондын хэлэлцээрүүд, хамтын ажиллагааны хөтөлбөрүүд амжилттай хэрэгжиж байгааг Ерөнхийлөгч болон Элчин сайд санал нэгтэй дүгнээд харилцааны зарим асуудлаар санал солилцов.
Мөн Босни-Герцеговин Улсаас Монгол Улсад суух Онц бөгөөд Бүрэн эрхт Элчин сайдаар тохоон томилогдсон Амел Ковачевич энэ өдөр итгэмжлэх жуух бичгээ өрган барилаа.
Хоёр улсын хоорондын харилцааг боломжтой салбаруудад хөгжүүлэхийн төлөө хичээн ажиллах болно хэмээн ноён Амел Ковачевич Ерөнхийлөгчтэй уулзахдаа ярив. Тухайлбал, хөдөө аж ахуй, мал аж ахуйн салбарт хамтран ажиллах боломжтой гэж үзэж байгаагаа илэрхийллээ. Ялангуяа, мал эмнэлгийн чиглэлээр туслалцаа дэмжлэг үзүүлэх боломж байна гэсэн юм.
Ерөнхийлөгч Ц.Элбэгдорж, итгэмжлэх жуух бичгээ өргөн барьсан Элчин сайдуудад баяр хүргээд, хамтын ажиллагааг шинэ шатанд гаргахын төлөө чармайн ажиллахыг хүсэн ерөөлөө.
Итгэмжлэх жуух бичгийг хүлээн авав
