Монгол Улсын Ерөнхийлөгч зарлиг гарган АНУ-ын Монголч эрдэмтэн Жак Уэтэрфордыг Монгол Улс, АНУ хоорондын найрамдалт харилцаанд оруулж буй үнэтэй хувь нэмэр болон Монголын түүхийг дэлхий нийтэд таниулан сурталчилж буй зүтгэлийг нь өндрөөр үнэлж “Найрамдал” медалиар шагнав.
Монголч эрдэмтэн Жак Уэтэрфорд нь Монголын эзэнт гүрний болон дундад үеийн түүхийн судалгааг 30 шахам жилийн туршид хийж Монголчуудын түүх соёл, өв уламжлал, баатарлаг амжилтыг өөрийн судалгааны бүтээлүүд, баримтат зохиолоороо дэлхий дахинд амжилттай таниулан 2004 онд “Өнөөгийн Ертөнцийг Үндэслэгч Эзэн Чингис хаан”, 2010 онд “Монголын их хатдын нууц товчоон” зэрэг номыг хэвлүүлсэн бөгөөд түүний бичсэн ном дэлхийн 20 гаруй орны хэл дээр хэвлэгдэн Нью-Йорк Таймс сонины шилдэг бүтээлээр хэд хэдэн удаа шалгарч байсан юм.
