Монгол Улсын Ерөнхийлөгч ард түмнээ шагналаа
Монгол Улсын Ерөнхийлөгч Ц.Элбэгдорж: “Та бүхэн бол хийсэн бүтээснээрээ бахархах эрхтэй олон олон иргэдийн маань нэр төртэй төлөөлөл юм”
Үндэсний их баяр, Их Монгол Улс байгуулагдсаны 804 жилийн ой, Ардын хувьсгалын 89 жил ой, Ардчилсан хувьсгалын 20 жилийн ойг тохиолдуулан Монгол Улсын Ерөнхийлөгч зарлиг гарган эх орныхоо хөгжил дэвшил, бүтээн байгуулалтад үнэтэй хувь нэмэр оруулж салбар салбартаа амжилт гаргасан нэр бүхий хүмүүсийг Монгол Улсын одон медалиар шагнаж хүндэтгэл үзүүллээ.
“Багануур” ХК-ийн экскаваторын машинч Баттөмөрийн Баатар энэ өдөр Монгол Улсын Хөдөлмөрийн Баатар боллоо. Уурхайн хүнд хэцүү нөхцөлд тасралтгүй 30 жил ажиллахдаа гаргасан түүний хөдөлмөрийн өндөр бүтээл, нэр хүнд, үлгэр дууриалыг “Баатрын энтэй хөдөлмөр” хэмээн хамт олон, салбарын удирдлагууд нь үзсэнийг Төр ч мөн хүлээн зөвшөөрсөн юм.
Амьдралынхаа бүхий л цаг хугацаа, хөдөлмөр, хөлс хүчээ эх нялхсын эрүүл мэндийн төлөө зориулж, сумын эмнэлэгт эх барих эмчээр тасралтгүй 40 жил ажилласан Говь-Алтай аймгийн Тонхил сумын эмч Павдайн Шижээ Монгол Улсын Ардын эмч боллоо.
Хөдөөгийн хүнд хэцүү нөхцөлд, хүн амынхаа эрүүл мэндийн төлөө “цаг наргүй зүтгэдэг” сумын эмч нарын алдар гавьяа өнөөдөр нэг биш үнэлэгдсэн юм. Дорноговь аймгийн Айраг сумын бага эмч Санзайдоржийн Жанцанхорлоо, Өвөрхангай аймгийн Есөн зүйл сумын их эмч Цэндийн Дамдинсүрэн нар Монгол Улсын Гавъяат эмч болсон юм.
Боловсролын салбарын гавъяатууд, шилдэг тэргүүний багш, сурган хүмүүжүүлэгчдийн төлөөлөл мөн л сум, орон нутгийн сургуулийн багш байна. Орхон аймгийн Баян-Өндөр сумын сургуулийн физикийн багшБадарчийн Цээсүрэн, Төв аймгийн Жаргалант сумын дунд сургуулийн зөвлөх багш Бүдхүүгийн Хуушаан нар энэ өдөр Монгол Улсын Гавъяат багш цол хэмээх эрхэм хүндтэй алдрыг хүртэн, олон мянган шавь, салбарын хамт олноо баярлуулав.
Нийслэлийн хот тохижуулах газрын жолооч Гүрийн Чадраабал энэ өдөр “Алтан гадас” одонгоор энгэрээ мялаасан юм. Нийслэл хотоо цэвэр цэмцгэр байлгах их үйлст 35 жил зүтгэж, хог ачин тээвэрлэх ажлыг тасралтгүй хийж байгаа Г.Чадраабалыг хамт олон нь төдийгүй, нийслэлийн иргэд байгууллагууд ажилсаг хөдөлмөрч, санаачилгатай хэмээн үнэлдэг юм.
Ийнхүү Үндэсний их баяр наадмын босгон дээр салбар салбартаа амжилт бүтээл гарган, ард түмнийхээ төлөө хөдөлмөрлөж зүтгэж яваа жирийн багш, эмч, уурхайчин, жүжигчин, дасгалжуулагч, холбоочин, тээвэрчин эдийн засагч- гавъяатууд төрлөө.
Монгол үндэстний бахархал болсон Их баяр наадмын босгон дээр төрсөн монгол түмний бахархал Баатар, Ардын Эмч болон гавъяатууддаа баяр хүргэе.
Монгол Улсын Ерөнхийлөгч ард түмнээ шагналаа
