Монгол түмэн сайхан наадаж байна
Монгол Улсын Ерөнхийлөгч Цахиагийн Элбэгдорж Үндэсний их баяр, Их Монгол Улс байгуулагдсаны 804 жилийн ой, Ардын хувьсгалын 89 жилийн ойн их баяр наадмыг нээж үг хэлсний дараа баяр наадмын нээлтийн ёслолыг үзэж сонирхов.
Энэ жилийн наадмын нээлт нь наадамчин олны сэтгэлийг баясгасан онцгой сонирхолтой үзүүлбэрүүдээр баялаг эхэллээ. Тухайлбал, Эзэн Чингэс хааны болон Жанжин Сүхбаатарын морьт цэргүүдээр сэдэвчилсэн “Морьтны гайхамшиг” үзүүлбэр, Цэрэг, хүчний байгууллагуудын үзүүлэх тоглолтууд нь наадамчдын талархлыг хүлээж байв.
Мөн Худалдаа, Аж Үйлдвэрийн Танхимын 50 жилийн ойг тохиолдуулан Монгол Улсын шилдэг компани, аж ахуйн нэгжүүд баярын жагсаалаар Төв цэнгэлдэхэд орж ирэн наадамчин олондоо мэндчилгээ дэвшүүлсэн юм.
Нээлтийн ёслолын дараа Монгол Улсын Ерөнхийлөгч Ц.Элбэгдорж, Тэргүүн хатагтай Х.Болормаа нар сур харвааны асарт зочлон эрхий мэргэн харваачиддаа баяр хүргэн амжилт хүсч, уламжлал ёсоор таван сум тавьж цэц мэргэнээ сорьлоо. Энэ жилийн сур харвааны хамгийн балчир оролцогч нь таван настай бяцхан хүү байгаа нь харваачид залуужиж байгааг илтгэж байв.
Монгол Улсын Ерөнхийлөгч ийнхүү сур харвааны асраар зочлохдоо Улсын гарамгай мэргэн, Гавъяат тамирчин Дорнод аймгийн Баян-Уул сумын харъяат улсад дөрөв түрүүлж, найм үзүүрлэсэн А.Цэвээн болон хамгийн бяцхан харваач болох БЗД-ийн 45-р цэцэрлэгийн Ц.Тэмүүжин, БЗД–ийн 102-р сургуулийн сурагч Б.Мөнхзаяа нарт гарын бэлэг гардуулж амжилт хүссэн юм.
Дараа нь Монгол Улсын Ерөнхийлөгч Ц.Элбэгдорж, Тэргүүн хатагтай Х.Болормаа нар шагайн харвааны асарт зочлон шагайн харваачиддаа баяр наадмын мэндчилгээ дэвшүүлэв
Ийнхүү Монгол наадам үргэлжилж байна.
Монгол түмэн сайхан наадаж байна
