Монгол Улсын Ерөнхийлөгч Ц.Элбэгдоржийн Үндэсний их баяр наадам, Их Монгол Улс байгуулагдсаны 804 жил, Ардын Хувьсгалын 89 жилийн ой, Ардчилсан хувьсгалын 20 жилийн ойг тохиолдуулан хийсэн төрийн дайллага дээр хэлсэн үг
Эрхэм хүндэт зочид оо,
Эрхэмсэг хатагтай ноёд оо,
Үндэсний их баяр, Их Монгол Улс байгуулагдсаны 804 жилийн ой, Ардын хувьсгалын 89 жилийн ойг тохиолдуулан хийж байгаа цайллагад хүрэлцэн ирсэн та бүхэнд талархал илэрхийлж аз жаргал сайн сайхан бүхнийг хүсэн ерөөе.
Энэ жил Ардчилсан хувьсгал өрнөсний 20 жилийн түүхэн ойг Монгол Улс ёслол төгөлдөр тэмдэглэж буй бөгөөд ирэх жил Монголын анхны төрт улс болох Хүннү Улс байгуулагдсаны 2220 жилийн ой, Их Монгол Улс байгуулагдсаны 805 жилийн ой, Үндэсний эрх чөлөөний хувьсгалын 100 жилийн түүхэн ой тус тус тохионо.
Их түүхийнхээ гэрэл гэгээ, алдар омогшил, сургамж шашдираас ухаарал авч өдгөө цагаа улам дэвшингүйд хүргэж ирээдүйн замналаа цогцлоох эрхэм үүрэг өнөө цагийн Монгол түмэнд тохиосон юм. Энэ учир тохиол нь монгол соёл, уламжлал, мөрөөдлийг дээдэлсэн нийт ард иргэдийн маань хамтын хүсэл зоригоор биелэх учиртай.
Энэ жилийн баяр наадам сайхан болж, хүн ардын сэтгэл санаа өөдрөг, итгэл тэмүүлэл өрнүүн байна. Өнгөрсөн жилийн наадмаас хойш манай улс нийгэм, эдийн засаг, улстөрийн хувьд олон чухал сорилтыг даван, түүхэн шийдвэрүүдийн эзэн болж багагүй амжилтад хүрлээ. Мөн дэлхийн улс орон хийгээд ард түмэнтэй болон олон улсын байгууллагатай харилцах хамтын ажиллагаа өргөжин тэлж манай улсын гадаад нэр хүнд өсөн дээшилж байна.
Баяр наадмын энэхүү өдрийг тохиолдуулан Монгол Улсын хөгжил цэцэглэлт бүтээн байгуулалтад гар бие оролцож ямагт тусалж дэмжиж ирсэн гадаад дотоодын хүндэт зочиддоо гүн талархал илэрхийлье.
Баяр наадмынхаа энэ хундагыг:
-Монгол Улсынхаа хөгжил цэцэглэлт, ирээдүйн сайн сайхны төлөө,
-Ард түмнийхээ аз жаргалтай, элэг бүтэн амьдралын төлөө,
-Эрхэмсэг хатагтай ноёд, Та бүгдийн эрүүл энх, амжилтын төлөө өргөе!
2010 оны 7 дугаар сарын 11
Монгол Улсын Ерөнхийлөгч Ц.Элбэгдоржийн Үндэсний их баяр наадам, Их Монгол Улс байгуулагдсаны 804 жил, Ардын Хувьсгалын 89 жилийн ой, Ардчилсан хувьсгалын 20 жилийн ойг тохиолдуулан хийсэн төрийн дайллага дээр хэлсэн үг
