Үндэсний баяр наадмыг тохиолдуулан Ромын Пап XVI Бенедикт-ээс мэндчилгээ ирүүлжээ
Энэ жил өргөн дэлгэр тэмдэглэсэн Монгол түмний их баяр, Их Монгол Улс байгуулагдсаны 804 жил, Ардын хувьсгалын 89 жилийн ойг тохиолдуулан гадаадын улс орнуудын удирдагчид, олон улсын байгууллагын төлөөлөгчдөөс баярын мэндчилгээнүүд ирүүлсээр байна.
Тухайлбал, Монгол Улсын Үндэсний баяр наадмыг тохиолдуулан Ромын Пап XVI Бенедикт мэндчилгээ ирүүлсэн бөгөөд тэрээр мэндчилгээндээ, “Монгол Улс үндэснийхээ баярыг өргөн дэлгэр тэмдэглэж байгааг тохиолдуулан Эрхэмсэг ноён Ерөнхийлөгч Ц.Элбэгдорж танд болон танай ард түмэнд баярын мэнд хүргэж халуун мэндчилгээ дэвшүүлье” гэжээ.
Улаанбаатар дахь Дипломат корпусын дарга, ХБНГУ-аас Монгол Улсад суух Онц бөгөөд бүрэн эрх Элчин сайд, ноён Пиус Фишер мэндчилгээ ирүүлжээ
Монголын үндэсний баяр наадмыг тохиолдуулан Улаанбаатар дахь дипломат корпусын дарга, Холбооны Бүгд Найрамдах Герман Улсаас Монгол Улсад суугаа Онц бөгөөд Бүрэн эрх Элчин сайд, ноён П.Фишер мэндчилгээ ирүүлжээ.
Тэрээр мэндчилгээндээ, “Эрхэмсэг Ноён Ерөнхийлөгчөө, Үндэсний баяр Наадмыг тохиолдуулан Дипломат корпусын нэрийн өмнөөс Танд чин сэтгэлээсээ баяр хүргэе. Дипломат корпус бүхэлдээ Монголын ард түмэнтэй хамт баяр Наадмыг ёслол төгөлдөр тэмдэглэж, эрийн гурван наадмыг үзэж буйдаа баяртай байна. Дипломат корпусын даргын хувьд, ноён Ерөнхийлөгч таньд эрүүл энхийг хүсэн цаашдын тань ажилд өндөр амжилт хүсэн ерөөе” хэмээжээ.
ОХУ-ын Воронеж мужийн захирагч А.Гордеев мэндчилгээ ирүүлжээ
ОХУ-ын Воронеж мужийн захирагч А.Гордеев Монгол Улсын Үндэсний их баяр наадмыг тохиолдуулан мэндчилгээ ирүүлжээ. Тэрээр мэндчилгээндээ, “Эрхэмсэг ноён, Ерөнхийлөгч Танд болон танай ард түмэнд Үндэсний баяр Наадмыг тохиолдуулан чин сэтгэлээсээ мэндчилж байгааг минь хүлээн авна уу.
Энэхүү баярын түүхэн уламжлал нь монгол түмний эв нэгдэл, мэргэн ухааныг бататгажээ. Монгол, Оросын стратегийн түншлэлийн шинэ үе шатыг ч мөн нэгдэл нягтрал, мэргэн ухаан тодорхойлж байгаа нь гүн утга агуулгатай билээ. Манай хоёр орны хамтын ажиллагааны зарчмууд нь өмнөх үеийн баялаг туршлагад тулгуурлаж байдаг юм. Эрхэм Ерөнхийлөгч Танд эрүүл энх, аз жаргалыг хүсэн, Монголын ард түмний цэцэглэл, хөгжлийн төлөөх үйлсэд тань шинэ амжилтыг ерөөе” гэжээ.
АНУ-ын Сенатор, ноён Марк Бегич мэндчилгээ ирүүлжээ
Мөн Монгол түмний баяр наадмыг тохиолдуулан АНУ-ын сенатын гишүүн, ноён Марк Бегич баярын мэндчилгээ ирүүлсэн байна.
Тэрээр мэндчилгээндээ монголын ардчилсан хувьсгалын ололт амжилтыг сайшаагаад “Монголын Ардчилсан хувьсгалын 20 жилийн ойг тохиолдуулан чин сэтгэлээсээ баяр хүргэе. Дэлхий дахины бусад шинэ тутам ардчилсан орнуудад таны нэр, үлгэр дууриал, эрч хүч, урам зориг өгдөг юм” хэмээн онцлон тэмдэглээд үндэсний баяр наадмаараа сайхан наадахыг хүсэн ерөөжээ.
