Ерөнхийлөгч ардчилсан нийгмийн үнэт зүйлс болох хүний эрх, эрх чөлөө, шударга ёс, эрх тэгш байдал, хууль дээдлэх ёс, зан заншлыг Монгол Улсын иргэдэд бага наснаас нь ойлгуулж, төлөвшүүлэх замаар нийтийн эрх зүйн боловсролыг дээшлүүлж, төрийн үйл ажиллагаанд оролцох иргэдийн оролцоог нэмэгдүүлэх зорилгоор, ерөнхий боловсролын сургалтын хөтөлбөр Монгол улсын Үндсэн хууль, хүний эрх, эрх чөлөө сэдэвт хичээлийг шинээр оруулах санал боловсруулах ажлын хэсгийг байгуулах анхны захирамжаа үзэглэсэн байна.
Төрийн тэргүүн шударга ёсыг тогтоож, хүний эрх, эрх чөлөөг хамгаалах ажиллагааг эрчимжүүлэх зорилгоор шүүх эрх мэдэл, хууль хяналтын байгууллагын бүтэц тогтолцоо тэдгээрийн үйл ажиллагааны эрхзүйн үндэслэлийг боловсронгүй болгох талаар дүгнэлт гаргаж, санал боловсоруулах ажлын хэсгийг байгуулж ажиллуулах захирамжийг мөн эл өдөр гаргалаа.
Мөн Ерөнхийлөгч Ц.Элбэгдорж ардчилсан хувьсгалын 20 жилийн ойг тохиолдуулан өршөөл үзүүлэх тухай хуулийн төслийг боловсруулах ажлын хэсгийг байгуулах захирамжид гарын үсэг зурлаа.
