Монгол Улсын Ерөнхийлөгч, Зэвсэгт хүчний ерөнхий командлагч Ц.Элбэгдорж Сүхбаатарын талбайд болсон Батлан хамгаалахын их сургууль, Хилийн цэргийн дээд сургуулийн төгсөлтийн ёслолын ажиллагаанд уламжлал ёсоор оролцож үг хэллээ.
Ерөнхийлөгч Ц.Элбэгдорж төгсөгчдөд хандан одоогоос хорь гаруй жилийн өмнө офицерийн эрхэм хүндтэй цол хүртэн ажил албаныхаа анхны томилолтоо авч байснаа дурсан санахад таатай байна гээд, Хилийн цэргийн дээд сургууль дүүргэсэн үе үеийн төгсөгчид эх орон, ард түмэндээ өргөсөн тангарагтаа үнэнч байж, нэр хүндтэй бөгөөд нэн хариуцлагатай албандаа эх оронч үлгэр дууриал болж ирснийг онцлон тэмдэглэсэн юм.
Төрийн тэргүүн цэргийн өндөр боловсрол эзэмшин, мэргэжлийн диплом, ахлагчийн анхны цолоо хүндэтгэлтэйгээр гардан авсан залуу офицер ахлагч, ёслолын ажиллагаанд оролцож байгаа БХИС, ЗХЖШ, ХХЕГ-ын нийт удирдлага бүрэлдэхүүнд халуун баяр хүргэж, эх орноо батлан хамгаалах, зэвсэгт хүчнийг чадваржуулах үйлсдээ улам их амжилт гаргахыг хүсэн ерөөлөө.
БХИС-ийн 79, ХЦИС-ийн 52 дахь төгсөлтөд Монгол Улсын Ерөнхийлөгч оролцож байгаа нь монголын төр зэвсэгт хүчиндээ онцгой анхаарал тавьж байдгийн илэрхийлэл гэж сургуулиудын удирдлага хэлсэн үгэндээ онцоллоо. Батлан хамгаалах их сургууль, Хилийн цэргийн дээд сургуулийн ёслолын арга хэмжээнд УИХ-ын гишүүн, Батлан хамгаалахын сайд Л.Болд, ЗХЖШ-ын дарга, дэслэгч генерал Ц.Тогоо нарын зэрэг албаны хүмүүс оролцлоо.
