Хуулийн төсөл өргөн барив
2010 оны 7 дугаар сарын 8-ны өдөр Эрүүгийн хуульд нэмэлт, өөрчлөлт оруулах тухай хуулийн төслийг УИХ-ын дарга Д.Дэмбэрэлд Ерөнхийлөгчийн Тамгын газрын дарга Д.Баттулга, Хуулийн бодлогын зөвлөх Г.Ганзориг нар өргөн барив.
“Авилгалын эсрэг Нэгдсэн Үндэстний Байгууллагын конвенц”-д Монгол Улсын дотоодын хууль тогтоомж, Эрүүгийн хуулийг нийцүүлж, Олон Улсын гэрээгээр Монгол Улсын хүлээсэн үүргийг хэрэгжүүлэх зорилгоор энэ хуулийн төслийг боловсруулжээ. “Авилгалын эсрэг Нэгдсэн Үндэстний Байгууллагын конвенц”-ын дагуу хэд хэдэн төрлийн үйлдлийг шинээр гэмт хэрэгт тооцохоор төсөлд тусгасан байна. Тухайлбал, хууль бусаар хөрөнгөжих үйлдлийг гэмт хэрэгт тооцохоор заажээ.
Түүнчлэн, албан тушаалтнуудын үйлдсэн гэмт хэрэгт хүлээлгэх эрүүгийн ял, хариуцлагыг нэмэгдүүлж, гэмт хэргийн хүнд, онц хүнд ангилалд багтаасан байна.
Эрүүгийн хуульд нэмэлт, өөрчлөлт оруулах тухай хуулийн төсөл нь, “хууль шүүхийн өмнө тэгш байх, шударга ёсыг тогтоох, авлигыг арилгах” Ерөнхийлөгчийн бодлогыг хэрэгжүүлэх нэн чухал арга хэмжээ болж байна.
Хуулийн төсөл өргөн барив
