Монгол Улсын Ерөнхийлөгчийн Тамгын газрын дарга Д.Баттулга “Алтаргана” наадмын хаалтын ажиллагаанд оролцож үг хэллээ
Буриад зоны наадам “Алтаргана” наадам энэ жил өргөн цар хүрээтэй, өрнүүн болж өндөрлөж байна. Энэ удаагийн наадамд Монгол Улс, ОХУ, БНХАУ, Якут, Халимаг, Узбекстан зэрэг орнуудаас олон мянган зочид хүрэлцэн ирж оролцжээ.
Өнөөдөр Соёлын төв өргөөнөө болсон “Алтаргана” наадмын хаалтын ажиллагаанд Монгол Улсын Ерөнхийлөгчийн Тамгын газрын дарга Д.Баттулга оролцож үг хэлсэн юм. Түүний үгийг бүрэн эхээр нь хүргэж байна.
Монгол Улсын Ерөнхийлөгчийн Тамгын газрын дарга Д.Баттулга
“Алтаргана” наадмын хаалтын ажиллагаан дээр
шагнал гардуулж хэлсэн үг
Эрхэм нөхөд өө,
Элэг нэгт ах дүүс ээ,
Энэ өдрүүдэд монгол хэлтэн, монгол туургатан түүний дотор Буриад түмний соёл уламжлалын их баяр, тэмдэглэлт үйл явдлууд болж байна.
Хэдхэн хоногийн өмнө Монгол Улсын Ерөнхийлөгч, “Дэлхийн монголчууд чуулган”-ын Хүндэт Ерөнхийлөгч Цахиагийн Элбэгдорж ОХУ-ын Буриад Улсад айлчилж, “Дэлхийн монголчууд чуулган”-ы IV Ерөнхий хуралдаанд оролцлоо. Энэ үйл явдал хөрш хоёр орны хийгээд монгол угсаа гарвалтан оршин суудаг улс орнуудтай найрсаг харилцаа хамтын ажиллагааг өргөжүүлэн хөгжүүлэхэд ул мөртэй, ашиг тустай, ач холбогдолтой болсон гэдэгт гүн итгэлтэй байгаагаа тэмдэглэн хэлэхэд таатай байна.
Өнөөдөр монгол түмэн, Улаанбаатар хот Буриадын соёл, урлаг, спортын “Алтаргана” хэмээх олон улсын их наадмын элэгсэг дулаан, найрсаг халуун уур амьсгалаар бялхаж, баяр бахдалд умбаж байгаа нь юутай сайхан бэ.
Энэ хоёр арга хэмжээг улс түмний найрамдал, хамтын ажиллагаа, соёл хүмүүнлэгийн харилцааны түгээмэл индэр, монгол түмний эв эеийн өргөн дэлгэр баяр болгон зохион байгуулсан, тусалж дэмжсэн, Монгол, Оросын төр засгийн байгууллагууд, төр нийгэм олон нийтийн зүтгэлтнүүд, нийт хүмүүст талархал илэрхийлье.
Ингээд энэ танхимд хуран цугларсан Та бүхэнд болон Та бүхнээр уламжлан “Алтаргана”наадамд оролцож байгаа буриад ахан дүүс, элэг нэгт монгол түмний элч төлөөлөгчид, монголын анд нөхдөд, ялангуяа өнөөдөр монгол төрийн хүндтэй шагнал хүртсэн ОХУ-ын ЭСЯ-ны болон Буриад Улсын төр нийгэм соёл шинжлэх ухааны нэрт зүтгэлтэн Та нартаа Монгол Улсын Ерөнхийлөгчийн нэрийн өмнөөс болон хувиасаа чин сэтгэлийн баяр хүргэж аз жаргал, сайн сайхны ерөөл өргөе.
Монгол түмний хэл, соёл, монгол туургатны эв эе үеийн үед мандаж байх болтугай.
Улс түмний найрамдал, хамтын ажиллагаа хөгжин дэлгэрч байх болтугай.
Монгол Улсын Ерөнхийлөгчийн Тамгын газрын дарга Д.Баттулга “Алтаргана” наадмын хаалтын ажиллагаанд оролцож үг хэллээ
