Монгол Улсын Ерөнхийлөгчийн тухай хуулийн 9 дүгээр зүйлийн 1 дэх заалтыг үндэслэн ЗАРЛИГ БУУЛГАХ нь:
Төрийн хан хуурын тодорхойлолтыг 1 дүгээр хавсралт, Төрийн хан хуур залах, цэнгүүлэх журмыг 2 дугаар хавсралт, Төрийн хан хуурыг цэнгүүлэхэд төр түмэндээ өргөх айлтгал магтаалыг 3 дугаар хавсралтын ёсоор тус тус баталсугай.
МОНГОЛ УЛСЫН | Н.БАГАБАНДИ |
ХУУЛБАР ҮНЭН | Б.Очирбат |
- оОо -
Монгол Улсын Ерөнхийлөгчийн 2005 оны
77 дугаар зарлигийн 1 дүгээр хавсралт
ТӨРИЙН ХАН ХУУРЫН ТОДОРХОЙЛОЛТ
1. Төрийн хан хуур (цаашид "Хуур" гэх)-ын өндөр 150 см
2. Үндэсний хээ бүхий царны өндөр 42 см, өргөн нь дээд ирмэгээрээ 25 см, доод ирмэгээрээ 31 см
3. Дөрвөн талын хацар модны өргөн 12 см
4. Царны хоёр талд таван эгшгийн билэгдэлт цоолбор хээ байна.
5. Хуурын ишний элгэн тал дээр эргэсэн есөн эвэр хээ дээр есөн эрдэнэ шигтгэнэ.
6. Эвэр хээний үргэлжлэх урт 77 см
7. Хуурын чавхдасыг хар хээр зүсийн хурдан удмын морины сүүлээр хийх ба урт нь 118 см
8. Хуурын эр хар суран хос угсаа 38 см
9. Чавхдасны 1 чангалуур хос чих 20 см
10. Доод тэвхний урт 110 мм, өндөр 50 мм
11. Дээд тэвхний урт 40 мм, өндөр 30 мм
12. Морины толгойн шанааны өргөн 55 мм, толгойн чихний урт 40 мм
13. Хуурын нумны урт 105 см, түүнд татсан хар хээр морины сүүлний хялгасны урт 114 см
14. Морины толгойн доод талд нар, cap, гал гурвыг үндэсний алхан хээгээр хүрээлүүлэн сийлнэ.
15.Хуурын чимэгт хоргоны өндөр 217 см, өргөн 99 см, ар тийшээ зузаан нь болон дээд ба доод өргөн нь тус бүр 31 см
16.Чимэгт хоргоны доод хэсэгт дэлгэрч байгаа бадамлянхуа, дээд талын дунд хэсэгт гурван эрдэнэ, нар, cap, гал дөрвийг, түүний дээд, доод тал, хажуугаар үндэсний өлзий хээнд сүвлэсэн урт цагаан хадаг хоёр тийшээ дэлгэгдэн байгаагаар сийлбэрлэнэ.
17.Чимэгт хоргоны гадна, дотно талыг нарны туяаны 1 улбар шар өнгөөр будна.
18.Чимэгт хоргоны хоёр талын босоо ирмэг дээгүүр эвэр хээгээр чимэглэнэ.
- оОо -
Монгол Улсын Ерөнхийлөгчийн 2005 оны
77 дугаар зарлигийн 2 дугаар хавсралт
ТӨРИЙН ХАН ХУУРЫГ ЗАЛАХ, ЦЭНГҮҮЛЭХ ЖУРАМ
1. Төрийн хан хуур (цаашид "Хан хуур" гэнэ)-ыг Төрийн Ёслол
хүндэтгэлийн өргөөнд байрлуулна.
2. Хан хуурыг Төрийн Ёслол хүндэтгэлийн өргөөнөөс түр гадагшлуулах бол Монгол Улсын Ерөнхийлөгчийн Тамгын газрын даргын захирамжаар
гүйцэтгэнэ.
3. Хан хуурыг Төрийн Ёслолын хүндэтгэлийн өргөөнөөс түр
гадагшлуулахад төрийн хан хуурч дагалдан явна.
4. Хан хуурыг залах, зөөх, тээвэрлэх үед зөвхөн чимэгт хоргонд нь байлгана.
5. Билэгийн тооллын шинэ жилийн эхэн буюу цагаан сарын шинийн нэгний морин цагт Төрийн Ёслол хүндэтгэлийн өргөөнд хан хуурыг төрийн хан хуурч татаж цэнгүүлнэ. Ийнхүү цэнгүүлэхдээ Хан хуурыг хөглөж, "Төрийн хан хуурын хөг тэгширлээ" гэж хурсан олонд зарлаад хан хуураар "Морины явдал" хэмээх үндэсний уламжлалт аялгууг эгшиглүүлнэ. Мөн "Төр түмэндээ өргөх айлтгал магтаал"-ыг хан хуурын аялгуунд өргөн дуудаж хэлнэ.
б.Төрийн хан хуурыг татаж цэнгүүлэх үеэр байлцах хүмүүс, зохиогдох ажлын дэс дарааг Төрийн ёслолын алба тогтооно.
7. Төрийн хан хуурчийг мэргэжлийн байгууллагаас санал авч Монгол Улсын Ерөнхийлөгчийн Тамгын газрын даргын захирамжаар томилно.
8. Төрийн хан хуурч нь хан хуурыг cap бүр үзэж, шаардлагатай арчилгааг хийнэ.
9. Хан хуурыг засварлаж сэлбэх бол төрийн хан хуурчийн биечилсэн хяналтын дор хан хуурыг урлан бүтээгч, мэргэжлийн бусад хүмүүсээр хийлгэнэ.
10. Төрийн хан хуурыг шинэчлэн хийх бол Монгол Улсын
Ерөнхийлөгчийн зарлигаар гүйцэтгэж, төрийн хан хуурын тодорхойлолтыг дахин
тодотгоно.
11. Төрийн болон нутгийн захиргааны байгууллагууд морин хуур залахдаа төрийн хан хуураас өндөргүй хуур зална.
12. Төрийн хан хуурч хүндэтгэх шалтгааны учир үүргээ гүйцэтгэж чадахгүй бол түр орлох хүнийг Монгол Улсын Ерөнхийлөгчийн Тамгын газрын даргын захирамжаар томилно.
13. Төрийн хан хуурч хан хуурыг татаж цэнгүүлэх бүрт Ерөнхийлөгчийн Тамгын газраас хан хуурчид талархал илэрхийлж, дурсгалын зүйл гардуулна.
14. Төрийн хан хуурын дүрс, нэрийг бизнесийн болон сурталчилгааны зорилгоор ашиглах, хуулбарлах, эсхүл дуурайлган үйлдэхийг хориглоно.
15. Төрийн хан хуурын дүрс бичлэг, фото, кино зургийг авах бол Монгол Улсын Ерөнхийлөгчийн Тамгын газрын даргын зөвшөөрлөөр гүйцэтгэнэ.