Монгол Улсын Ерөнхийлөгч Ц.Элбэгдорж Хельсинк хотод төвтэй Нордикийн хөрөнгө оруулалтын банкинд зочиллоо. Финланд, Швед, Дани, Норвег, Исланд гэсэн Хойд Европын таван орон хөрөнгө оруулж тус банкийг 1975 онд байгуулсан бөгөөд 2005 оноос Эстони, Латви, Литви улс нэгджээ. Тус банк гишүүнчлэл харгалзахгүй аль ч оронд ч зээл олгодог бөгөөд зээлийн хөрөнгөө олон улсын санхүүгийн зах зээлээс босгодог байна. Тус банкны дэд ерөнхийлөгч Гүннар Окк хэлэхдээ Нордикийн хөрөнгө оруулалтын банк нь зөвхөн байгаль орчны салбарт үйл ажиллагаа явуулдаг олон улсын санхүүгийн цорын ганц байгууллага болохыг онцолж байлаа. Байгаль орчин, эрчим хүч, дэд бүтэц, технологийн шинэчлэл гэсэн үндсэн 4 чиглэлээр тус банк зээлээ олгодог байна.
Монгол Улсын Ерөнхийлөгч Ц.Элбэгдорж тус банкны CLEERE хэмээх уур амьсгалын өөрчлөлт, эрчим хүчний зээлийн хөтөлбөрийн хүрээнд Улаанбаатар хотын утааг бууруулах төсөл хэрэгжүүлэх санал тавьж ярилцав. Ерөнхийлөгчийн зүгээс санаачлаад байгаа ” Мод тарих үндэсний өдөр” хөдөлгөөнийг хэрэгжүүлэхэд шаардлагатай хөрөнгийн эх үүсвэрийг тус банкны зүгээс санхүүжүүлэх боломжтой ажээ.