Монгол Улсад албан ёсны айлчлал хийж байгаа БНСУ-ын Үндэсний Батлан хамгаалахын сайд Ли Сан Хи тэргүүтэй төлөөлөгчид өнөөдөр МУ-ын Ерөнхийлөгчид бараалхлаа.
Ноён Ли Сан Хи БНСУ-ын Ерөнхийлөгч Ли Мун Бак болон тус улсын Ерөнхий сайд нарын мэндчилгээг Ерөнхийлөгч Ц.Элбэгдоржид уламжлав.
Ерөнхийлөгч Ц.Элбэгдорж, БНСУ-ын Ерөнхийлөгч болон Ерөнхий сайд нарын мэндчилгээг уламжилсанд талархсанаа илэрхийлээд, хоёр орны хооронд дипломат харилцаа тогтоосны 20 жилийн ой 2010 онд болох бөгөөд энэ хугацаанд хоёр орны төрийн тэргүүн нарын харилцан хийсэн айлчлалууд нь хоёр орны хооронд олон салбарт хамтын ажиллагаагаа өргөжүүлэхэд тус нэмэр болж ирснийг тэмдэглэв.
БНСУ-ын Зэвсэгт хүчин нь улс орныхоо хөгжил цэцэглэл,бүтээн байгуулалтад оролцож ирсэн баялаг туршлагатай гээд, Монголын Зэвсэгт хүчнийг улс орныхоо бүтээн байгуулалтад идэвхитэй оролцуулах чиглэл барьж байгааг онцоллоо. Иймд, энэ чиглэлээр хоёр орны Батлан хамгаалахын салбарынхан илүү өргөн хүрээнд хамтран ажиллах байх гэж найдаж байгаагаа мөн хэлсэн юм.
Сүүлийн хэд хоногт байгалийн гамшигт үзэгдэл үер усны аюулаас болж учирсан хохирлыг арилгахаад Зэвсэгт хүчний анги салбаруудыг оролцуулан ажиллуулж байгаа талаар Ерөнхийлөгч дурдаад байгалийн өөрчлөлт, сөргөөр нөлөөлөх болсон энэ цагт хоёр орны хамтын ажиллагааны дэмжлэгийн хүрээнд манай улсад барилга инженерийн анги салбар байгуулагдах болж байгаа нь цаг үеээ олсон яриа болж байна гэж сайшаав.
Мөн Монголын ард түмэн Солонгосын ард түмэнд асар хүндэтгэлтэй ханддаг бөгөөд Солонгосын ард түмэн ч манай ард түмэнд ингэж ханддаг гэж Ерөнхийлөгч Ц.Элбэгдорж хэлээд, Монголд анх удаа айлчилж байгаа эрхэм сайдад манай орноос сайхан сэтгэгдэлтэй буцахыг ерөөн БНСУ-ын Ерөнхийлөгч Ли Мун Бак болон Ерөнхий сайд нарт өөрийн халуун мэндчилгээг дамжуулахыг хүслээ.