Өнөөдөр Монгол Улсын Ерөнхийлөгч Ц.Элбэгдорж НҮБ-ын суурин зохицуулагч, НҮБ-ын Хөгжлийн хөтөлбөрийн суурин төлөөлөгч хатагтай Дебора Комини-г хүлээн авч уулзлаа.
Монгол Улсад ядуурлыг бууруулж, сайн засаглалыг бэхжүүлж, тогтвортой хөгжлийг хангахад НҮБ-ын тусламж дэмжлэг, хамтын ажиллагаа туйлын чухал байсаар ирсэн.Түүнчлэн НҮБ-ын Хөгжлийн Хөтөлбөрийн зүгээс Монгол улсад Мянганы Хөгжлийн Зорилтуудыг хэрэгжүүлэхэд, дэмжиж ажиллаж байгаад Ерөнхийлөгч талархал илэрхийллээ.
Хэдхэн өдрийн дараа Монгол Улсад болох НҮБ-ын Ерөнхий Нарийн бичгийн даргын айлчлалд Монголын төр, засаг өндөр ач холбогдол өгч байгаа.
Энэ айлчлалын үеэр, дэлхийн дулаарлын үр нөлөөний эсрэг авах арга хэмжээ, НҮБ-ын энхийг сахиулах ажиллагаан дахь Монголын оролцоо болон далайд гарцгүй орнуудын хэрэгцээ шаардлагыг хөнгөвчлөх зэрэг тодорхой асуудлуудад анхаарлаа хандуулах боломж гарна гэдэгт найдаж байна гэж Ерөнхийлөгч Ц.Элбэгдорж ярилаа.
НҮБ-ын Хөгжлийн Хөтөлбөр 2011 он хүртэлх үйл ажиллагааны төлөвлөгөөг 2 жилийн өмнөөс батлан ажиллаж байгаа. Ядуурлыг бууруулах, хүний эрхийг хамгаалж, шударга ёсны хүртээмжийг нэмэгдүүлэх, байгаль орчин болон эрчим хүчний тогтвортой байдлыг хангах, гамшгаас урьдчилан сэргийлэх зэрэг чиглэлүүдийг үйл ажиллагааны төлөвлөгөөндөө гол болгож байгаа тухай Хатагтай Дебора Комини танилцууллаа.
НҮБ-ын Хөгжлийн Хөтөлбөр болон Монгол улсын хамтын ажиллагааны талаар, энэ сарын 26-28нд болох НҮБ-ын Ерөнхий нарийн бичгийн дарга ноён Бан Ги Муны айлчлалын тухай болон бусад асуудлаар уулзалтанд оролцогчид санал солилцлоо.
НҮБХХ-ийн Суурин төлөөлөгч хатагтай Дебора Комини энэ оны 6-р сараас үүрэгт ажилдаа орсон бөгөөд, МУ-ын Төрийн Тэргүүнтэй анх удаа уулзаж байгаа нь энэ юм.