Монголын үндэсний олимпийн хорооны тэргүүн дээд шагнал гардуулах “Бөртэ чоно-2015” ёслолын ажиллагаа өнөөдөр болж Монгол Улсын Ерөнхийлөгч Ц.Элбэгдорж оролцон үг хэллээ.
Өмнөх жилүүдэд шилдэг 10 тамирчныг тодруулдаг байсан бол энэ жил шилдэг эрэгтэй, эмэгтэй тус бүр гурван тамирчин тодруулжээ. Эрэгтэй тамирчдаас чөлөөт бөхийн тамирчин ОУХМ Э.Бэхбаяр, эмэгтэйчүүдээс дэлхийн хошой аварга, олимпийн хүрэл медальт С.Батцэцэг нар шилдгээр шалгарав. Ерөнхийлөгч Ц.Элбэгдорж дэлхийн хошой аварга, олимпийн хүрэл медальт С.Батцэцэгийн шагналыг гардуулан өгсөн юм.
Монгол Улсын Ерөнхийлөгч Ц.Элбэгдорж шагнал гардуулах ёслолын үеэр хэлсэн үгэндээ “Спортод амжилт байнга гарч байдаг учраас шилдгүүдийг шалгаруулахад хэцүү байдаг. Их хөдөлмөрлөсөн хүнийг амжилт дагадаг гэж би боддог. Тууштай, хариуцлагатай хүнийг амжилт дагадаг. Тууштай, хариуцлагатай, хөдөлмөрч байж амжилт гарна.
Удахгүй 2016 он гарах гэж байна. Хариуцлагатай жил. Олимпийн жил. Би жил бүр “Бөртэ чоно”-ын шалгаруулалтын ёслолд ороод байж чаддаггүй. Энэ жил ороод гаръя гэж бодсон юм. Яагаад гэвэл бидний 4 жил хүлээсэн тэр жил маань гарах гэж байна. 2016 оны олимп хаяанд ирж байна. Олимп өөр тивд болно. Үүнд бид бэлтгэлээ маш сайн базаах хэрэгтэй. Олимпийн эрх авах боломжуудаа бүрэн ашиглах хэрэгтэй. Олимпдоо маш өндөр амжилтай оролцох ёстой. Монголын ард түмний хувьд олимпоос хүлээх хүлээлт маш өндөр болсон. Энэ өндөр хүлээлтийг давхар давхар баяраар мялаах ёстой. Латин Америкийн тэнгэрт Монголын далбаа мандаж, Монголын Төрийн дуулал олон удаа дуулагдаасай гэж чин сэтгэлээсээ хүсч байгаа. Ийм учраас та нартаа амжилт хүсэх гэж, та бүхнийгээ зоригжуулах гэж, монголчууд үнэхээр авьяастай, чадалтай, боловсролтой хүмүүс, ийм сайхан амжилт гаргаж чадна гэдэгт итгэж байгаагаа илэрхийлье.
Олимпийн төрөлд амжилт гаргадаг, дэлхийн аваргад амжилт гаргадаг медаль авсан тамирчиддаа Монголын ард түмэн, төр хангалтай дэмжлэг үзүүлж байгаа. Сар бүр медальт тамирчиддаа тэтгэлэг олгодог болсон. Үүнийг хангалттай дэмжлэг гэж харж байгаа. Энэ дэмжлэг бол маш их том хүндэтгэл. Ард түмэндээ баярлах хэрэгтэй., Ард түмэнд авчирсан баяр баясал, нэр хүндийг бодож ард түмний цуглуулсан, олсон хөрөнгө, боломж, тэр баяр талархлаас та нарт дэмжлэг үзүүлж байгаа юм.
Тиймээс үүнийг үргэлж хүндэтгэж, баярлаж, цаашаа ахиж явах ёстой. Олимпийн төрлөөр хичээллэдэг, дэлхийн аваргын төрлүүдээр хичээллэдэг тамирчдын тоо, сонирхол нэмэгдсэн. Спортоор хүн хичээллэнэ гэдэг бол их зөв хүн болохын, хариуцлагатай хүн болохын эхлэл гэж би боддог. Тийм учраас спорт бол тухайн ард түмэнд маш чухал үүрэгтэй зүйл гэдгийг энд хэлэх ёстой.
С.Батцэцэг маань дэлхийн хошой аварга болсонд маш их баярлаж байгаа. Чамд олимпийн аварга болох бүрэн боломж байна. Монгол Улсад дэлхийн аварга, олимпийн аваргыг хоёуланг нь авсан хүн одоогоор төрөөгүй байна. Ийм боломж манай С.Батцэцэгт байгаа. Сэтгэл зүйн хувьд өөрийгөө сайн бэлтгэж, сайн хичээж ажиллах ёстой. Дэлхийн аваргаа дахиж, олимпийн аваргыг шинээр аваарай гэж Батцэцэгтээ ерөөе. Энд сууж байгаа нийт тамирчиддаа хүсэн ерөөе.
Шинэ оны мэнд хүргэе. Амжилт хүсье. Баяр хүргэе, та бүхэндээ. Баярлалаа” гэлээ.