Монгол Улсын Ерөнхийлөгч Ц.Элбэгдорж өнөөдөр, АНУ-ын Техас мужийн шүүхийн шүүгч, Вейсленийн Их сургуулийн Хуулийн сургуулийн профессор, Азийн шүүхийн институтын захирал Жой Спарлактай уулзлаа.
Ноён Ж.Спарлак нь Монгол улсын эрхзүйн шинэтгэл, шүүхийн шинэчлэлд хувь нэмрээ оруулсан, монголын олон хуульчдын мэдлэг боловсролыг хилийн чанадад дээшлүүлэхэд хүчин зүтгэж ирсэн хуульч хүн юм.
2002 онд Шүүхийн тухай хуульд нэмэлт өөрчлөлт оруулах үед, Шүүхийн Ерөнхий зөвлөлийг Дээд шүүх болон ХЗДХЯ-аас хараат бусаар бие даалгах санал, зөвлөгөөг тэрээр өгч байсан боловч, энэ санал ажил хэрэг болоогүй билээ.
Харин өнөөдөр Монгол Улсын Ерөнхийлөгч Ц.Элбэгдорж, шүүхийн үйл ажиллагааг шударга, хараат бус байлгах зорилгын хүрээнд Шүүхийн Ерөнхий зөвлөлийн дүрмэнд өөрчөлт орох ёстой гэж үзэж байгаа билээ.
Шүүхийн тухай багц хуулиудад нэмэлт өөрчлөлт оруулах хуулийн төслөө УИХ-ын намрын чуулганд өргөн барина гэж уулзалтын үеэр Ерөнхийлөгч хэллээ.
Ноён Ж.Спарлак Шүүхийн Ерөнхий зөвлөлийг сонгодог утгаар нь хараат бусаар байгуулах нь энэ цаг үед маш чухал болохыг хэлээд, шүүх эрх мэдлийн шинэчлэлийн асуудлаар Ерөнхийлөгчтэй санал бодлоо солилцлоо.