“Сумын дүрэм”-ийг нийт ард иргэдээр нээлттэй хэлэлцүүлнэ
Монгол Улсын Ерөнхийлөгчийн дэргэдэх “Иргэний танхим”-аас өнөөдөр хэвлэлийн бага хурал зохион байгуулж, Ерөнхийлөгчийн зөвлөх Л.Дашдорж мэдээлэл хийлээ. Тэрээр хэлэхдээ “Орон нутагт төсвийн эрх мэдлийг шилжүүлэх бэлтгэл ажлын хүрээнд нийслэл, аймаг, сум, дүүрэг, хороодын эрх, үүргийг тодорхой болгох зорилгоор Ерөнхийлөгчийн тамгын газрын дэргэд “Сумын дүрэм” боловсруулах ажлын хэсэг ажиллаж байна. Ажлын хэсгээс боловсруулсан “Сумын дүрэм”-ийн төслийг нийт ард иргэдээр нээлттэй хэлэлцүүлнэ.
“Сумын дүрэм” нь орон нутагт төсвийн эрх мэдлийг шилжүүлэхэд иргэдийн оролцоо ямар байхыг буюу тэдний үүрэг, хариуцлагыг тодорхойлж өгөх зорилготой юм. Нэн ялангуяа төсөвтэй холбоотой асуудлыг шийдэхэд иргэд, Иргэдийн төлөөлөгчдийн хурал, Засаг даргын Тамгын газар, Засаг дарга ямар үүрэгтэй оролцохыг нарийн зааглаж өгөх нь зүйтэй юм болов уу гэж үзсэн. Энэ ажлыг хийхэд нэлээд судалгаа хийсэн. Иргэдийн оролцоо, хяналт хангалтгүй үед боломж, хөрөнгө мөнгийг Засаг дарга нар машин унаа авах зэргээр үр ашиггүй зарсан баримт их байдаг. Иймээс дүрэм боловсруулж, иргэдийн оролцоо, хяналтыг дээшлүүлэхийг чухалчилсан юм. Нэрийг нь одоохондоо яг тогтоогүй, хотын, сумын гэж янз янзаар хэлж байгаа. Гэхдээ энэ дүрмийг сум ч, аймаг ч, хот ч хэрэглэж болно. Энэ дүрмийн төслийн талаар хамгийн анхны нээлттэй хэлэлцүүлгийг 11 дүгээр сарын 24-нд “Иргэний танхим”-д хийнэ ” гэж ярилаа.
Нээлттэй хэлэлцүүлэгт иргэдийн саналыг “Иргэний танхим”-ын хаягаар, мөн факс, цахим шуудангийн хаягаар 11 дүгээр сарын 23-ыг дуустал авна. Мөн нээлттэй хэлэлцүүлгийн хуралдаанд оролцох иргэдийг 11 дүгээр сарын 15-22-нд “Иргэний танхим”-ын утас, факс, цахим шуудангаар бүртгэнэ.
“Сумын дүрэм”-ийг сонирхохдоо www.president.mn хаягаар орж үзээрэй.
“Сумын дүрэм”-ийг нийт ард иргэдээр нээлттэй хэлэлцүүлнэ
