Ц.Элбэгдорж: Хөгжил байгаль орчинд ээлтэй байх ёстой
(Ерөнхийлөгч Ц.Элбэгдорж Токиогийн их сургуульд лекц уншив)
Монгол Улсын Ерөнхийлөгч Цахиагийн Элбэгдоржийн Япон Улсад хийж буй төрийн айлчлал үргэлжилж байна. Айлчлалын хоёр дахь өдөр Ерөнхийлөгч Ц.Элбэгдорж Токиогийн их сургуульд “Хөгжил дэвшил ба байгаль орчин” сэдвээр лекц уншлаа.
Лекцийн эхэнд тус сургуулийн ерөнхийлөгч Ж.Хамада хэлэхдээ “Монгол Улсад өрнөсөн ардчиллын тэргүүн эгнээнд анхнаас нь тууштай явж байгаа нэр хүндтэй энэ хүнийг урьж, лекций нь сонсох гэж буй нь манай сургуулийн хувьд нэр төрийн хэрэг юм. Монгол Улс ардчилсан Ерөнхийлөгчтэй болсон нь идэр залуу ардчилалд монголын ард түмний өгсөн үнэлэлт дүгнэлт байлаа. Ерөнхийлөгч Таны энэхүү чухал айлчлал манай хоёр орны харилцаа, хамтын ажиллагааг шинэ шатанд гаргахад үр дүнгээ өгнө гэдэгт итгэж байна. Токиогийн их сургууль дэлхийн оюун ухааны уурхай болохыг зорьж байгаа. Таны өнөөдөр унших “Хөгжил дэвшил ба байгаль орчин” лекц манай оюутан сурагчид, эрдэмтэн судлаачдын хувьд ховор аз завшаан болох юм” гэлээ.
Ерөнхийлөгч Ц.Элбэгдорж ярихдаа байгаль орчин, хөгжил дэвшил хэрхэн улам бүр харилцан хамааралтай, хил хязгааргүй болж байгааг тайлбарлаж, аливаа хөгжлийг зөвхөн байгаль орчинд ээлтэй л бол хөгжил гэж тооцох дэлхийн шинэ хандлагын талаар өөрийн санаа бодлоо хэллээ. Байгаль орчинд хамгийн ээлтэй байдлаар аж төрдөг монголчууд хотжилтын эрхээр амьдралын хэв маягаа өөрчилж байгаа тухай, мөн дэлхийн дулаарлын нөлөөгөөр монгол орон цөлжиж байгаа талаар ярив. “Монгол ахуй, нүүдэлчин соёл иргэншил бол хэдэн мянган жилийн турш шалгарсан, хамгийн цэвэр, байгаль орчинд ээлтэй “технологи” юм. Монголд жилийн 300 орчим өдөр нартай байдаг. Энэ нь хүн ардыг цэвэр эрчим хүчээр хангах эх үүсвэр байж болох талаар эрдэмтэд судалгаа хийж байна. Монголын говьд нарны эрчим хүчийг ашиглан цахилгаан үйлдвэрлэх судалгааны ажил эхлүүлэхийг би дэмжих болно” гэлээ.
Байгальд ээлтэй хөгжил дэвшил, шинэ технологийг нэвтрүүлэхэд Токиогийн их сургууль, түүнд суралцагчдын үүрэг оролцоо чухал байх болно гэдгийг Ерөнхийлөгч яриандаа дурдсан юм.
Лекцэд оролцсон эрдэмтэн судлаачид, оюутнууд Монгол Улсын Ерөнхийлөгчөөс дэлхийн дулаарлын эсрэг тэмцэхэд монголчуудын оруулж болох хувь нэмэр, уул уурхайн олборлолт ба энэ салбарын байгаль орчинд үзүүлэх нөлөөлөл, боловсон хүчин бэлтгэх бодлого, цөлжилт, нүүдлийн мал аж ахуй зэрэг олон сэдвээр асуулт асууж, харилцан ярилцлаа.
Токиогийн их сургууль 1877 онд байгуулагджээ. Одоо Японы хамгийн нэр хүндтэй энэ сургуульд 30 мянга орчим япон, 3 мянгаад гадаад оюутан суралцаж байна.
Өнөөдөр Токиогийн их сургуульд 100 гаруй гадаад оюутан монгол хэл сурч байгаа ажээ.
Ц.Элбэгдорж: Хөгжил байгаль орчинд ээлтэй байх ёстой
