Австрали улсаас Монгол улсад суух Онц бөгөөд Бүрэн эрхт Элчин сайд ноён Сэм Герович өнөөдөр МУ-ын Ерөнхийлөгч Ц.Элбэгдоржид итгэмжлэх жуух бичгээ барилаа.
Элчин сайдыг хүлээн авч уулзах үеэрээ Ерөнхийлөгч Ц.Элбэгдорж, ардчилал шинэчлэлийн замаар хөгжих болсон тэр цагаас эхлэн Австрали улс нь манай орныг дэмжсээр ирснийг онцлон тэмдэглээд удахгүй Монгол улсын Ерөнхий сайдын Австрали улсад хийх анхны айлчлалын үеэр хоёр орны харилцаа, хамтын ажиллагааны хөгжлийн асуудлуудаар үр дүнтэй яриа хэлэлцээр хийгдэнэ гэж найдаж байгаагаа хэлэв.
Мөн Австрали улсын уул уурхайн салбарын хөгжлийн зарим ололт нь Монгол улсад энэ салбарыг хөгжүүлэхэд ач тустай жишээ болж болох юм гэлээ.
Элчин сайд ноён Сэм Герович Ерөнхийлөгчийн хүлээн авч уулзсанд талархсанаа илэрхийлээд, хоёр орны хамтын ажиллагааг цаашид улам хөгжүүлэх, тэр дундаа Австрали улсад суралцах монголын оюутнуудын тоог нэмэх сонирхолтой байгаагаа илэрхийлэв.
Мөн тэрээр НҮБ-ын Аюулгүй байдлын зөвлөлийг өргөтгөж түүнд далайн орнуудын төлөөлөл болох Австрали улсыг багтаах асуудлыг Монгол улс дэмжинэ гэдэгт найдаж байгаагаа уламжиллаа.