МОНГОЛ УЛСЫН ЕРӨНХИЙЛӨГЧИЙН ТАМГЫН ГАЗРЫН ДАРГЫН ЗАХИРАМЖ
2011 оны 01 сарын 07 өдөр дугаар 03 Улаанбаатар хот
Журам батлах тухай
Монгол Улсын Ерөнхийлөгчийн Тамгын газрын дүрмийн 7 дугаар зүйлийн 7.11, 7.15 дугаар заалт, Монгол Улсын Ерөнхийлөгчийн 2010 оны 12 дугаар сарын 09-ний өдрийн “Үндэсний бүтээн байгуулалтын дээд шагнал – Төрийн гэрэгэ” шагнал бий болгох саналыг дэмжих тухай” 255 дугаар зарлигийг үндэслэн ЗАХИРАМЖЛАХ нь:
“Үндэсний бүтээн байгуулалтын дээд шагнал – Төрийн гэрэгэ” шагналын журмыг хавсралтын ёсоор баталсугай.
ТАМГЫН ГАЗРЫН ДАРГА Д.БАТТУЛГА
Ерөнхийлөгчийн Тамгын газрын даргын 2011 оны 01 дүгээр сарын 07-ны өдрийн 3 дугаар захирамжийн хавсралт
“ҮНДЭСНИЙ БҮТЭЭН БАЙГУУЛАЛТЫН ДЭЭД
ШАГНАЛ-ТӨРИЙН ГЭРЭГЭ” ШАГНАЛЫН ЖУРАМ
Нэг. Нийтлэг үндэслэл
1. Монгол орны эдийн засаг, нийгэм, оюун санааны хөгжилд шинэ жишгийг авчирч, дэлхийн стандартад хүрч, улс орныхоо нүүр царай, өрсөлдөх чадварын нэрийн хуудас болж чадсан бүтээн байгуулалтыг шалгаруулж, жилд нэг удаа, билгийн тооллын он солигдохын өмнө олгоно.
2. Шагналыг Монгол хүний оюун ухаан, авъяас чадвар, хөдөлмөр зүтгэлээр цогцлон бүтээгдэж, тухайн ондоо үйл ажиллагаагаа явуулж эхэлсэн үйлдвэр, барилга, байгууламж, цогцолбор, хэвлэгдэн гарсан ном зохиол, үзэгчдэд хүрсэн урлаг, соёлын бүтээлд олгоно.
3. Нэг жилд олгох шагналын тоо 3-аас хэтрэхгүй байна.
4. Шагнал нь уг шагналыг олгох тухай Монгол Улсын Ерөнхийлөгчийн зарлигийн бичвэр бүхий батлагдсан загварын дагуу хийгдсэн цом байх бөгөөд жил бүр сар шинийн баярыг тохиолдуулан Монгол Улсын Ерөнхийлөгч зарлиг гарган Төрийн ёслол хүндэтгэлийн өргөөнд гардуулна.
5. Уг шагналыг хүртсэн бүтээн байгуулалтыг бий болгох ажилд идэвх санаачилгатай оролцсон, гардан бүтээсэн, зохион байгуулсан хүмүүсийг төрийн алдар цол одон медалиар шагнаж болох бөгөөд эдгээр шагналыг цом олгох ёслолтой хамтатган зохион байгуулж гардуулна.
Хоёр. Нэр дэвшүүлэх, шалгаруулах
1. ”Үндэсний бүтээн байгуулалтын дээд шагнал Төрийн гэрэгэ” шагналд дараахь байгууллагууд нэр дэвшүүлнэ.
- Аймаг, нийслэлийн ИТХ, Засаг даргын Тамгын газар - өөрийн орон нутагт тухайн жилд бий болсон бүтээн байгуулалтыг;
- Төрийн яамд - өөрийн салбарт тухайн жилд бий болсон бүтээн байгуулалтыг;
2. Иргэд, төрийн бус байгууллагууд дэмжиж буй бүтээн байгуулалтынхаа талаар саналаа ирүүлж болнго.
3. Нэр дэвшүүлэх бүтээн байгуулалтыг сонгохдоо дараахь шалгуурыг хангасан эсэхийг харгалзан үзсэн байна. Үүнд:
- Тухайн бүтээн байгуулалт нь хэмжээ, далайцаараа дэлхийн хэмжээнд хүрсэн;
- Тухайн бүтээн байгуулалтанд ашиглаж буй техник технологийн түвшин, гиноваци, бүтээгдэхүүний чанар дэлхийн стандарт, жишигт хүрсэн;
- Оюуны өмчийн гэрчилгээ, патент авсан;
- Өөрийн салбартаа кластер бүрдүүлэгч толгойлох зүтгүүр үйлдвэр болох нөхцлийг хангасан;
- Бүтээгдэхүүнээ экспортлогч болсон;
- Улсын болон орон нутгийн төсвийн найдвартай орлого бүрдүүлэгч болсон
- Тухайн орон нутгийн хөгжлийн чиг хандлагыг тодорхойлогч болсон;
- Ажлын байрыг олноор бий болгосон;
- Монголчуудын оюун санааны хөгжилд шинэ үе шат нээсэн;
4. Архи тамхи, буу зэвсэг үйлдвэрлэгчийг энэ шагналд дэвшүүлэхгүй.
5. Нэр дэвшүүлэх ажлыг нэр дэвшүүлэх эрх бүхий байгууллагууд жил бүрийн
1 дүгээр сарын 25-ны дотор дуусган нэр дэвшүүлэх тухай шийдвэрийг шаардлагатай баримт бичгийн хамт Ерөнхийлөгчийн Тамгын газарт ирүүлсэн байна.
6. Шагналд нэр дэвшүүлэн ирүүлсэн материалыг Ерөнхийлөгчийн Тамгын газрын даргын захирамжаар байгуулагдсан ажлын хэсэг нягтлан судална.
Гурав. Бүрдүүлэх баримт бичиг
1. Нэр дэвшүүлсэн материал нь дараахь баримт бичгээс бүрдэнэ. Үүнд:
- Шагналд нэр дэвшүүлсэн тухай эрх бүхий байгууллагын тогтоол, шийдвэр;
- Нэр дэвшсэн бүтээн байгуулалтын танилцуулга, холбогдох материалууд;
- Тухайн бүтээн байгуулалт нь энэхүү журмын 2-т заасан шалгуур үзүүлэлтүүдийг хангаж байгааг нотолсон дүгнэлт, бичиг баримт, судалгаа;
- Нэр дэвшсэн бүтээн байгуулалтын өмчлөгч /эзэмшигч/ этгээдийн улсын бүртгэлийн гэрчилгээ, эсхүл түүнтэй адилтгах бичиг баримт;
- Нэр дэвшсэн бүтээн байгуулалтын тухай хэвлэл мэдээллийн хэрэгслээр сурталчилсан, танилцуулсан материалууд;
- Нэр дэвшсэн бүтээн байгуулалтыг бүтээх ажилд идэвх санаачлагатай оролцсон, гардан бүтээсэн, зохион байгуулсан хүмүүсийг төрийн алдар цол, одон, медалиар шагнуулах тухай шийдвэр, холбогдох материалууд /энэ тохиолдолд төрийн одон медалиар шагнах журмын дагуу материалыг нэмж бүрдүүлнэ/.
Дөрөв. Ажлын хэсэг
1. Уг шагналд нэр дэвшсэн бүтээн байгуулалтуудаас сонгон шалгаруулах ажлыг Ерөнхийлөгчийн Тамгын газрын даргын захирамжаар томилогдсон ажлын хэсэг гүйцэтгэнэ.
2. Ажлын хэсгийн бүрэлдэхүүнд Ерөнхийлөгчийн Тамгын газар, Шинжлэх ухааны академи, Монголын үндэсний худалдаа аж үйлдвэрийн танхим, Үндэсний хөгжлийн хүрээлэн, Үндэсний бүтээмжийн төв, Өрсөлдөх чадварын төв, Нийслэлийн засаг даргын тамгын газраас тус тус төлөөлөл оролцуулан Ерөнхийлөгчийн Тамгын газрын даргын захирамжаар байгуулна.
3. Ажлын хэсэг нь нэр дэвшин ирсэн материалуудтай танилцан судалж санал дүгнэлтээ Монгол Улсын Ерөнхийлөгчид танилцуулна.
4. Уг ажлын хэсэг шаардлагатай бол бүтээн байгуулалттай газар дээр нь очиж танилцах, холбогдох төрийн болон мэргэжлийн байгууллагууд, мэргэжилтнүүдээс лавлагаа, дүгнэлт авах, иргэд, хэрэглэгчдийн санал сэтгэгдлийг судлах ажлыг зохион байгуулна.
5. Ажлын хэсгийн хуралдаан тэмдэглэл, шийдвэр, нэр дэвшүүлж ирсэн баримт бичгүүдийн хамт Ерөнхийлөгчийн Тамгын газрын архивт хадгалагдана.
---------оОо----------