Монгол Улсын Ерөнхийлөгчийн Тамгын газрын дарга Д.Баттулга морин хуурч Пүрэвхүүгийн Тэмүүжинд Ерөнхийлөгчийн нэрэмжит шагнал өнөөдөр гардуулж баяр хүргэв.
Түүнд өгсөн өргөмжлөлд “Монголын ард түмний үе үеийн хүсэл тэмүүлэл авьяас билэг, урам зориг хийгээд амьдралын бүхий л үзэгдлийн мөн чанарыг зуун зууныг дамжуулан өөрийн увьдист аялгуундаа шингээж ирсэн Морин хуур хөгжмийг Нэгдсэн Үндэстний Байгууллага, ЮНЕСКО-гоос хүн төрөлхтний оюуны үнэт өвд бүртгэн дэлхий нийтэд зарлан тунхагласан билээ.
Монгол төрийн төдийгүй, монгол айл өрх бүрийн гал голомтын хойморт залран буй Морин хуур хөгжмийг эзэмшин суралцах, өвлөн дээдлэх, түүнчлэн түгээн дэлгэрүүлэх талаар Монгол Улсын үе үеийн төрийн тэргүүд анхааран зарлиг гаргаж, өв соёлын үнэт баялгийн хувиар төрийн бодлогын түвшинд дээдэлж ирсэн билээ.
Мөнх хөх тэнгэр, Этүгэн газар эхийн элбэрэл дор мянга мянган жил оршин тогтнож ирсэн Монгол түүхийн бахархалт нэгэн зэмсэг болох Морин хуурын айзам яруу эгшгээр түмэн олноо төдийгүй, олон улс, тив дэлхийн хэмжээнд бүтээл туурвилаа хүргэж “Монголын бахархал” болж яваа эрхэм хүндэт Пүрэвхүүгийн ТЭМҮҮЖИН таньд Монгол Улсын Ерөнхийлөгчийн 2011 оны нэрэмжит шагналыг хүртээв” гэжээ.