17 дугаар жарны төмөр туулай жилийн Хаврын тэргүүн сарын Шинийн нэгэнд Монгол Улсын Ерөнхийлөгчийн Тамгын газрын дарга Д.Баттулга, УИХ-ын Тамгын газрын Ерөнхий нарийн бичгийн дарга Ц.Шаравдорж, Засгийн газрын Хэрэг эрхлэг газрын дарга Ч.Хүрэлбаатар нар Монголын бурхан шашинтны төв Гандантэгчинлэн хийдэд морилон Мэгжид Жанрайсиг бурханд хүндэтгэл үзүүлэн Монгол түмний заяа буян ирж буй шинэ ондоо өөдөө түвшин байхын ерөөл өргөлөө.
Энэ үеэр Лам хуваргууд сүсэгтэн олонд зориулан мандал өргөсөн бөгөөд ЕТГ-ын дарга Д.Баттулга хэлсэн үгэндээ, “Ирж буй Төмөр туулай жилдээ Монголчууд маань бүгдээрээ элэг бүтэн, эрүүл саруул байж хүн бүр, айл өрх бүр өмнөө тавьсан зорилгодоо хүрч түмэн олон маань түвшин сайхан байхын өлзийтэй ерөөлийг дэвшүүлье. Монгол түмэн маань сар шинэдээ сайхан шинэлээрэй” хэмээн мэндчилгээ дэвшүүлэв.