Монгол Улсын Ерөнхийлөгчийн дэргэдэх “Иргэний танхим”-д Байгаль орчны манлайлагч хөтөлбөрийн нээлт боллоо. Тус хөтөлбөрийг “Зориг” сангаас эрхлэн хэрэгжүүлж байгаа бөгөөд түүнд төрийн, төрийн бус, хувийн хэвшлийн болон олон улсын байгууллагад ажилладаг 18 залуу шалгаран хамрагдаж буй ажээ.
Байгаль орчны асуудлаар анх удаагаа хэрэгжиж буй энэ хөтөлбөрийг Ньюком групп, Хас банк, Оюу толгой ХХК зэрэг байгууллагууд ивээн тэтгэж, хөтөлбөрт нь оролцох юм байна.
Энэхүү хөтөлбөрийг дэмжин Ерөнхийлөгчийн ахлах зөвлөх П.Цагаан залуучуудад “Дэлхийн хөгжлийн чиг хандлага, түүн дэх Монгол Улсын орон зай 2020 онд” сэдвээр лекц уншлаа. Тэрээр хэлэхдээ “Удирдагч буюу лидер болох эрмэлзэлтэй манлайлагч залуучуудтай уулзаж буйдаа баяртай байна. Дэлхий ертөнц даяаршиж буй өнөө үед удирдагч болохын тулд хөгжил хааш явж байгаа дүр төрхийг харах нь нэн чухал. Тиймээс би ийм сэдэв сонголоо. Хялбаршуулж ойлговол даяаршил бол мэдээлэл, мөнгө, хүмүүс, барааны чөлөөт урсгал юм. Энэ нь орон зай, цаг хугацааны ойлголтыг өөрчилж байна. Ийм цаг үед оюун санааны тусгаар тогтнол их чухал. Хэл, соёл уламжлал, түүхээ сайн мэддэг бол оюун санааны хувьд тусгаар байж болно. Мөн засаглалын өрсөлдөх чадварыг хөгжүүлэх, хувийн хэвшлийг бэхжүүлэхэд анхаарах хэрэгтэй. Үүнд мөнгө, хүний хүчин зүйл, менежмент, цаг хугацаа онцгой үүрэгтэй. Бид байгаа боломжоо ашиглаж чадвал дэлхийн хамгийн хурдан хөгжиж буй 5 орны нэг болох уу, үгүй юу гэдгээ шийдэх цаг ирнэ. Катар 15 жилийн өмнө төрийн албан хаагчдынхаа цалинг ч тавьж чадахгүй байсан шүү дээ. Гэтэл одоо дотоодын нийт бүтээгдэхүүний нэг хүнд ногдох хэмжээгээр хамгийн өндөр орны нэг болсон байна. Монголчууд бидэнд боломжоос гадна сайн талууд бий. Хурдан дасан зохицдог, юм сайн сурдаг гэх мэт. Байгалийн нөөцөө зөв зохистой, эдийн засаг, оюун боломжоо сайн ашиглахыг хүн бүр хичээцгээгээрээ хэмээн хэлмээр байна ” гээд залуучуудын сонирхсон асуултад хариулав.