Монгол Улсын Ерөнхийлөгч Ц.Элбэгдорж зарлиг гарган, Халхын голын байлдаанд оролцсон ахмад дайчдад шагнал гардууллаа. 1939 оны Халхын голын байлдаан, 1945 оны чөлөөлөх дайн, 1944, 1947 оны баруун хязгаарын зэвсэгт тулгаралтад оролцож эх орныхоо эрх чөлөө, тусгаар тогтнолыг хамгаалахад амь биеэ үл хайрлан, эрэлхэг зоригтой, баатарлагаар тулалдсан түүхэн гавъяаг нь өндрөөр үнэлж Дугарын Гунгаад Монгол Улсын “Баатар” цол олгож, Сүхбаатар одон, “Алтан таван хошуу” медалиар шагналаа.
Мөн Цагааны Дамдинжав, Жигмэдийн Үнэнбат, Нямын Сүрэн нарын ахмад дайчныг Сүхбаатарын одонгоор, Дэндэвийн Ням, Дамирангийн Жамъяан, Содномын Цэвэлдорж, Шархүүгийн Цоохүү, Тамжидын Гэндэн, Буниагийн Аюурзана нарын ахмад дайчныг Цэргийн гавъяаны улаан тугийн одонгоор, Очирын Лааган, Дамдингийн Лувсанбазар, Шагдарын Санжаа, Должингийн Дэмбэрэл, Сүрэнгийн Лхамжав, Мөнх-Очирын Наран, Огнонгийн Сумъяа нарын ахмад дайчныг Цэргийн гавъяаны одонгоор тус тус шагнаж урамшуулав.
Монгол Улсын өдгөө цагийн тусгаар тогтнол, эрх чөлөөт амьдралыг эр цэргийн ёсоор хатамжлан сахиж, залуу халуун насаа ард түмэн, эх орныхоо төлөө зориулсан баатарлаг гавъяат ахмад дайчдад хандаж Монгол Улсын Ерөнхийлөгч Ц.Элбэгдорж хэлсэн үгэндээ: “Сая шагнал өгсөн ахмадуудаас “Монгол Улсын Баатар” гэдэг эрхэм дээд алдар цол хүртсэн Дугарын Гунгаа гуайн тухай, нэгэн ахмад дайчны тухай жишээ хэлье.
Д.Гунгаа гуай бол 70 жилийн өмнөх дайнд оролцсон Монголын Зоригт шонхруудын анхдагч, манлайлагч, ахлагч нь явсан билээ. Ганцхан жишээ дурьдахад 1939 оны 9 дүгээр сард буюу зөвхөн нэг сарын дотор 158 удаа байлдааны нислэг үйлдэж, эх орон ард түмнийхээ өмнө гайхамшигтай гавъяа байгуулсан хүн.
Энэ гавъяа нь бүх үед үйлдсэн дайны баатарлаг нисгэгчдийн дээд амжилтын нэгд тооцогддог юм. Д.Гунгаа гуай бол өнгөрсөн зуунд манай орны зүүн бүсэд гарсан дайн тулааны анхны байлдааны онгоцны нисгэгчдийн нэг, бас баруун хил дээр өрнсөн Гоминдантай хийсэн зэвсэгт тулгаралтад сүүлчийн цэг тавьсан баатарлаг эх оронч юм.
Та бүхэн Д.Гунгаа гуайтай адил ийнхүү тулалдаж тэмцэж явсан аугаа ахмад дайчид юм. Та бүхний маань үйлс, Та бүхний маань эх орныхоо төлөө зүтгэсэн зүтгэл, тулалдаанд оролцсон гавъяаг үеийн үед, Монголын ард түмэн, Монголын төр дурсаж явах болно” хэмээн онцлон тэмдэглэлээ.
Эх орноо батлан хамгаалах, харийн халдан түрэмгийлэгчдийг бут цохих эрхэм үйлсэд ахмад дайчин Д.Гунгаагийн оруулсан хувь нэмэр, байгуулсан гавъяа их бөгөөд Дайнд оролцогсдын Монголын хорооны тодорхойлолтонд “ Нисэх хүчний эгнээнд дөнгөж 2 жил болж байсан 23 настай залуу нисгэгч Д.Гунгаа 1939 оны Халхын голын байлдаанд Р-5 онгоцоор шөнийн бөмбөгдөлт хийхийн зэрэгцээ, Зөвлөлтийн нисэх хороонд зохион байгуулсан сургалтаар И-15 сөнөөгч онгоц эзэмшин, Отрядын дарга болж, Зөвлөлтийн алдарт нисгэгчдийн хамт 8дугаар сарын шийдвэрлэх давшилтад амжилттай оролцож, эх орны зоригт шонхоруудын нэг болохоо харуулж, дайн дууссаны дараа нисэх 1-р хорооны бүрэлдэхүүнд шинээр байгуулагдсан сөнөөгч онгоцны эскадрилийн даргаар ажилласан байна. Тэрээр 1944 онд Булган голын савд үүрлэсэн гоминдааныханд цохилт өгөх анхны бөмбөгийг хаяж, радио станцыг нь ганц бөмбөгөөр сөнөөх үүргийг биелүүлж, бүх цэргийн жанжин штабын даргад сайшаагдаж байжээ” хэмээн дурджээ. Энх цагийн бүтээн байгуулалтын жилүүдэд тэрээр Монголын иргэний агаарын тээврийн тулгын чулууг тавилцаж гал голомтыг нь бадраасан юм.