Ерөнхийлөгчид Жэй Пи Морганы Цаг уурын хөтөлбөрийн гүйцэтгэх захирал Эдвард, Майкро энержи кредитсийн ерөнхий захирал Эйприл нар бараалхав
Монгол Улсын Ерөнхийлөгч Ц.Элбэгдоржид АНУ-ын Жэй Пи Морганы Цаг уурын хөтөлбөрийн гүйцэтгэх захирал Эдвард Ханрахан, Майкро энержи кредитсийн ерөнхий захирал Эйприл Оолдердийс нар өнөөдөр бараалхаж, хөрөнгийн бирж дэх хүлэмжийн хийн сайн дурын зах зээл, Монголд үзүүлж буй өөрсдийн тус нөлөөний талаараа танилцуулж, энэ ажилдаа дэмжлэг үзүүлж холбоотой ажиллахыг хүслээ.
Ерөнхийлөгч Ц.Элбэгдорж нийслэлийн агаарын бохирдлыг бууруулах тухай хууль санаачлан УИХ-аар батлуулаад байгаа бөгөөд уг хуулийг хэрэгжүүлэх зорилгоор олон ажил төлөвлөж буй гэдгийг дурдаад энэ хүрээнд тэдний үйл ажиллагааг дэмжихэд бэлэн гэв.
Тус байгууллага нь карбон зээлийн хүрээнд Хас банктай хамтран ажиллаж эхлээд буй юм байна. Энэ зээл нь утаа худалдах замаар дэлхийн томоохон компаниудын үүсгэсэн тусгай сангаас мөнгөний эх үүсвэртэй болдог ажээ. Одоогоор Хас банкнаас гэрийн дулаалга, утаагүй зуух авах зэрэгт иргэд зээл авч буйг карбон зээлийн тусламжтайгаар хүүг нь эрс багасгах боломж бүрдэх юм байна. Өөрөөр хэлбэл Хас банк гэр хорооллынхон дулаалга, хэмнэлттэй зуух, цахилгаан халаагуур зэргийг хэрэглэн утаагаа эрс багасгасныг хэмжүүлэн бүртгэлжүүлж, үр дүнг нь дээрх байгууллагад явуулснаар тусгай сангаас мөнгө авах бөгөөд түүгээрээ зээлийн хүүгээ багасгах юм.
Уулзалтад Ерөнхийлөгчийн зөвлөх Л.Пүрэвсүрэн, Э.Зоригт, Тэнгэр санхүүгийн нэгдлийн гүйцэтгэх захирал М.Болд нар байв.
Ерөнхийлөгчид Жэй Пи Морганы Цаг уурын хөтөлбөрийн гүйцэтгэх захирал Эдвард, Майкро энержи кредитсийн ерөнхий захирал Эйприл нар бараалхав