Өнөөдөр өглөө найман цагт Монгол Улсын Ерөнхийлөгч Цахиагийн Элбэгдорж Сүхбаатар дүүргийн Ражив Гандийн нэрэмжит Үйлдвэрлэл Урлалын сургуулийн хичээлийн шинэ жилийн нээлтэнд оролцов.
Тавь шахам жилийн түүхтэй тус сургууль нь өнгөрсөн хугацаанд 30 гаруй мэргэжлээр 15.000 гаруй мэргэжилтэй ажилчин, 200 орчим дээд боловсролтой инженер, техникчдыг бэлтгэсэн байна.
Ерөнхийлөгч тус сургуулийн оюутнуудын бүтээсэн гар урлалын үзэсгэлэнг үзэж сонирхсоны дараа нийт багш ажилчид, оюутан залууст хандаж үг хэллээ. Тэрээр: “Өнөөдөр улс орон даяар баяртай үйл явдал тохиож байна. 55 гаруй мянган зургаан настай Монголын бяцхан үрс анх удаа сургуулийн босгыг алхаж, мөн яг та нар шиг 40 гаруй мянган оюутнууд мэргэжил сургалт үйлдвэрлэлийн төвийн хичээлийн жилийнхээ нээлтэд оролцож, 40 гаруй мянган багш ажилчид хичээл сургуулийнхаа ажилд эргэн орж байна. Энд суралцаж байгаа оюутнууд Та бүхэн ирээдүйд зөвхөн өөртөө төдийгүй бусдадаа ч ажлын байр бий болгож чадах тийм чадварыг эзэмшсэн байх ёстой. Цаашдаа бид МСҮТ-үүдийг улам бэхжүүлэхийн төлөө эрчимтэй ажиллах болно. Монголын төр засгаас МСҮТ-үүдийг байнга анхаарах болно. МСҮТ-үүд бэхжиж, өргөжснөөр ажилгүйдэл буурах асар их боломж байгаа учраас Монгол Улсын Ерөнхийлөгчийн хувьд би үүнд хамгийн ихээр анхаарах болно. Тун удахгүй Монголын эдийн засгийн өсөлтөд нөлөөлөх томоохон үйлдвэрүүд нээгдэх болно. Тэр бүхэнд үндэсний боловсон хүчин хэрэгтэй. Тэднийг бэлтгэдэг газар нь МСҮТ-үүд байх юм. Та бүхний ирээдүй гэрэлтэй байна. Ирээдүйг чинь улам гэрэлтэй болгохын төлөө зүтгэх болно” гэв.
Ражив Гандийн нэрэмжит Үйлдвэрлэл Урлалын дээд сургуульд зочилсныхоо дараа Монгол Улсын Ерөнхийлөгч Ц.Элбэгдорж Хөдөлмөрийн гавъяаны улаан тугийн одонт МХЗЭ-ийн 40 жилийн ойн нэрэмжит Нийслэлийн Сүхбаатар дүүргийн 3 дугаар сургуулийн хичээлийн шинэ жилийн нээлтэд оролцов.
1800 сурагчтай тус сургуулийн захирал Ц.Сарангэрэл Ерөнхийлөгчид хандан: “Манай улсын хамгийн ууган сургууль болох 88 жилийн түүхтэй З дугаар сургуульд Монгол Улсын анхны Ардчилсан Ерөнхийлөгч Та зочлон ирсэнд манай хамт олон талархаж байгаагаа илэрхийлье” гэв.
Дараа нь Монгол Улсын Ерөнхийлөгч тус сургуулийн нээлтэд оролцож буй багш сурагчид, эцэг эхчүүдэд зориулж үг хэлсэн юм. Мөн Ерөнхийлөгч хоёрдугаар цагийн хичээлийг “Дэлхийн дулаарал” сэдвээр заасан бөгөөд МҮОНТ болон Боловсрол суваг телевизээр орон даяар шууд дамжуулан үзүүллээ.
Энэ удаагийн хичээл нь жил бүрийн 9 дүгээр сарын 1-нд тухайн жилд тулгамдаж буй хамгийн гол асуудлыг шийдвэрлэх үүднээс уламжлал болон зохион байгуулагдах “хоёрдугаар цагийн хичээл”-ийн эхлэл болж байгаа юм. Ерөнхийлөгчийн заасан анхны хичээлээр хүүхэд, залуу үед эх дэлхийгээ хайрлах, дэлхий нийтийн анхаарлын төвд байгаа цаг агаарын өөрчлөлт болон уг бэрхшээлийг шийдвэрлэхэд иргэн хүний үүрэг оролцоо ямар чухал болохыг ойлгуулахыг зорьсон байна.
Тухайлбал дэлхийн цаг агаарын өөрчлөлт 2000 жил тутамд 1 хэмээр дулаарч байсан бол сүүлийн 100 жилд 1 хэмээр дулаарсан байна. Гэтэл Монгол Улсын оршин байгаа бүс нутагт энэ хувь хэмжээ даруй 2 дахин өсчээ. Үүний шалтгаан нь манай улс ой модтойгоо зүй бусаар харьцсанаар дулаарал ийнхүү эрчимтэй явагдаж байгааг тайлбарлав.
Ерөнхийлөгч Ц.Элбэгдорж хичээлийнхээ төгсгөлд дэлхий нийтийн өмнө тулгамдаж буй дулаарлын эсрэг зөвхөн том гүрнүүд төдийгүй Монгол Улс ч санаа тавьж буй бөгөөд, ирэх есөн сард Нью- Йорк хотноо болох НҮБ-ын дээд чуулган дээр уриалга гаргахаа онцлов. Монгол Улс боловсролын тогтолцоондоо энэ төрлийн хичээл оруулж, Ерөнхийлөгч төдийгүй мэргэжилтнүүд, багш нар энэ сэдвээр хичээл орж, олон бодитой ажлыг эхлүүлэх санаачлага гаргав. Ерөнхийлөгчийг хичээл заах явцад сурагчид сонирхсон зүйлээ чөлөөтэй асууж, хариулт авч байсан бөгөөд тус сургуулийн 3“а” ангийн сурагч Мөнхболдын Дагинаст хичээлд идэвхитэй оролцсоныг нь үнэлэн Ерөнхийлөгч Ц.Элбэгдорж Ерөнхий сайд байхдаа болон Ерөнхийлөгч болсноосоо хойш ч хэрэглэсээр ирсэн үзгээ дурсгасан юм.