Монгол Улсын Ерөнхийлөгчийн дэргэд “Төмөр замын бодлогын дэд зөвлөл” байгуулагдаж өнөөдөр анхны хуралдаанаа хийлээ. Хуралдааныг Нийслэлийн Засаг даргын орлогч Да.Ганболд удирдаж, Монгол Улсын төмөр замын өнөөгийн байдал, Улаанбаатар төмөр замын өөрчлөн байгуулалтын талаар ярилцав. Энд тус зөвлөлийн гишүүдээс гадна төмөр замын салбарт ажиллаж байсан болон одоо алба хашиж буй хүмүүсийн төлөөлөл оролцсон юм. Төрийн өмчийн хорооны төрийн өмчийн удирдлага, хувьчлалын газрын ахлах мэргэжилтэн Д.Байлыхүү “Улаанбаатар төмөр замын өөрчлөн байгуулалт”, Зам тээвэр, барилга, хот байгуулалтын дэд сайд А.Гансүх “Төрөөс төмөр замын тээврийн талаар баримтлах бодлого” гэсэн илтгэлүүд тавив. Уг илтгэлүүдэд Улаанбаатар төмөр замын өнөөгийн тулгамдаж буй асуудлууд хийгээд түүнээс гарах арга зам, төрөөс баримтлах бодлогын талаар тодорхой дурдсан байлаа. Оролцогчид саналаа хэлж, эдийн засгийн болон геополитикийн онцгой ач холбогдолтой салбар тул асуудлыг задлан нарийвчлан ярилцах шаардлагатай гэдэг дээр санал нэгдэв.