Шинжлэх Ухааны Академи байгуулагдсаны 50 жилийн ойн их чуулганд оролцогсдод
Эрхэм хүндэт эрдэмтэн судлаачид, шинжлэх ухааны зүтгэлтнүүд,
Хатагтай, ноёд оо,
Та бүхэнд Монгол Улсад Шинжлэх Ухааны Академи байгуулагдсаны 50 жилийн ойн баярын мэндийг дэвшүүлж хамгийн сайн сайхан бүхнийг хүсэн ерөөе.
БНМАУ-ын Ардын Их хурлын Тэргүүлэгчдийн зарлигаар Шинжлэх Ухааны Академи байгуулагдсан цагаас хойших хагас зуун жилд манай орны шинжлэх ухааны салбар бүхий л талаар өргөжин хөгжиж үндэсний судалгаа шинжилгээний томоохон чадавхитай боллоо. ШУА-ийн эрдэмтэд, судлаачид өөрийн орны түүх, соёл, эх хэлний судалгааг өргөн хүрээнд амжилттай явуулсан нь үндэсний тусгаар тогтнолыг батжуулах, Монголыг дэлхийд таниулах, манай нийгмийн сэтгэлгээний болон соёлын ерөнхий түвшинг хөгжүүлэхэд чухал үүрэг гүйцэтгэсэн билээ.
Түүнчлэн академийнхний шууд оролцоотойгоор эрдэс баялгийн шинэ ордуудыг нээх, хөдөө аж ахуй, анагаахын шинжлэх ухааны салбарт малын шинэ үүлдрүүд бий болгох, хүн малын халдварт өвчнөөс урьдчилан сэргийлэх, хамгаалах олон төрлийн эм бэлдмэл бий болгох зэрэг ажлыг амжилттай хийж эдийн засгийн салбарт нэвтрүүлсэн байна.
Монгол Алтайн их уулсын Таван Богд орчмоос илрүүлсэн эртний нүүдэлчний мөстлөгтэй булш, Ноён уулын Сүжигтийн ам нь дахь Хүннүгийн язгууртны булшнаас илрүүлсэн сонирхолтой олдворууд, Хэнтий аймгийн Норовлин сумын Салхитын хөндийгөөс олдсон “Mongolianthropus” хэмээн дэлхийн шинжлэх ухаанд алдаршаад буй “Homo erectus-ын толгойн ясны үлдэгдэл”, “Үлэмж биет махан идэшт үлэг гүрвэлийн зулзагын бүтэн хэлхээ яс”, “Үлэг гүрвэлийн судалгаа”, “Ижил төстэй ховор элементүүд ба хөнгөн цагаан цахиурт нэгдлүүд ялгарч хуримтлагдах геохимийн үзэгдэл”, “Монгол орны тектоникийн зураг” зэрэг дэлхийн шинжлэх ухааны хөгжилд хувь нэмэр оруулсан бүтээлүүдийг баярын энэ өдөр онцлон дурьдахад таатай байна.
Манай орны шинжлэх ухааны үндсэн салбаруудын суурь болон хэрэглээний судалгааны түвшин гүнзгийрч, технологийн боловсруулалт хийх чадамж, судалгаа, боловсруулалтын ажлын үр дүнг үйлдвэрлэлд нэвтрүүлэх ажилд ахиц гарч байна. Монгол Улсад ардчилал, зах зээлийн харилцаа гүнзгийрэхийн хэрээр мэдээлэл, мэдлэгт тулгуурласан үндэсний эдийн засаг, инновацийн үр ашигтай тогтолцоог бий болгох шаардлага чухлаар тавигдах боллоо.
Даяаршиж буй дэлхий ертөнцөд шинжлэх ухааны шинэ ололтууд хурдацтай түгэн дэлгэрч буй энэ цаг дор улс үндэстнийхээ шинжлэх ухаан, нийгмийн хэрэгцээг дэлхийн түрлэгтэй чадварлаг хослуулж, олон улсын эрдэм шинжилгээний хамтарсан судалгааны орчилд идэвхтэй байр суурь эзэлж, судалгаа, шинжилгээний ажлын шилдэг арга ухаан, технологиос байнга суралцах, нэвтрүүлэх, нутагшуулах, нягт хамтран ажиллаж, шинжлэх ухааны салбарын ажлын чанар, үр өгөөжийг дээшлүүлнэ гэдэгт Монгол Улсын Төрийн тэргүүн би итгэлтэй байна.
Өнгөрсөн хугацааны ажил үйлсээ нухацтай дүгнэж, шинжлэх ухааны байгууллагын бүтэц, зохион байгуулалтыг дэлхийн сайн жишигт ойртуулах, эрдэм шинжилгээний ажилтан, судлаачдын чадавхийг сайжруулах, орчин цагийн техник, технологи, инновацийн ололтыг үйл ажиллагаандаа тууштай нэвтрүүлэн ажиллахыг Та бүхнээс хүсье.
Монголын Шинжлэх Ухааны салбарын бодлого, үйл ажиллагаа онч мэргэн, ололт амжилтаар дүүрэн байх болтугай.
МОНГОЛ УЛСЫН ЦАХИАГИЙН
ЕРӨНХИЙЛӨГЧ ЭЛБЭГДОРЖ
Улаанбаатар хот
2011 оны 5 дугаар сарын 26-ны өдөр