“Гамшгаас хамгаалах талаар төрөөс баримтлах бодлого, хөтөлбөрийг хэрэгжүүлэх нь” Үндэсний бага хуралд оролцогчдод
Монгол Улсын Засгийн газрын тохируулагч агентлаг Онцгой байдлын ерөнхий газар, НҮБ-ын Хөгжлийн хөтөлбөрийн төслөөс хамтран зохион байгуулж байгаа “Гамшгаас хамгаалах талаар төрөөс баримтлах бодлого, хөтөлбөрийг хэрэгжүүлэх нь” Үндэсний бага хуралд оролцогчид Та бүхэнд чин сэтгэлийн мэндчилгээ дэвшүүлье.
Гамшиг, гэнэтийн аюул, осол халдлагаас ард иргэдээ хамгаалж, улс орны тогтвортой хөгжил, Үндэсний аюулгүй байдлын баталгааг хангах нь төрийн анхдагч бөгөөд хойшлуулшгүй чухал үүрэг мөн.
Улсын Их Хурлаас өнгөрсөн 5 дугаар сард батлан мөрдүүлсэн ”Гамшгаас хамгаалах талаар төрөөс баримтлах бодлого”, “Гамшгаас хамгаалах чадавхийг бэхжүүлэх үндэсний хөтөлбөр” баримт бичгүүд нь өнгөрсөн онд батлагдсан Монгол Улсын үндэсний аюулгүй байдлын шинэ бодлогыг хэрэгжүүлэх хүрээнд төрөөс тавьж буй хүчин чармайлтын илэрхийлэл болно.
Шинээр батлагдсан баримт бичгүүд гамшгаас хамгаалах талаарх эрх зүйн орчинг боловсронгуй болгох, эрсдлийн үнэлгээ хийх, гамшгийн эрсдлийн даатгалын тогтолцоо бий болгох, зарлан мэдээллийн тогтолцоог орчин үеийн мэдээллийн технологийг ашиглан шийдвэрлэх болон гамшгийн эрсдэл, ялангуяа газар хөдлөлтийн эрсдлийг бууруулахад бүх нийтийн оролцоог хангах, мэргэжлийн хүч хэрэгслийн чадавхийг сайжруулах зэрэг тулгамдсан олон асуудлыг шийдвэрлэхэд чухал түлхэц өгнө гэдэгт итгэж байна.
Дэлхий дахинаа байгалийн гамшиг, осол нэмэгдэхийн хэрээр маргаашийн аюулгүй байдлын төлөө өнөөдөр анхаарч, гамшгаас урьдчилан сэргийлэх, эрсдлийг бууруулахад чиглэсэн хөрөнгө оруулалтыг нэмэгдүүлэх, нөөцийг үр ашигтай зарцуулах асуудлууд олон улсын хэмжээнд онцгой ач холбогдолтой болж байна. Шинээр батлагдсан гамшгаас хамгаалах бодлого энэ чиг хандлагатай нийцэж байгааг тэмдэглэхэд таатай байна.
Гамшгаас хамгаалах үндэсний чадавхийг бэхжүүлэхийн тулд зохион байгуулалт, хүний нөөц, хөрөнгө санхүүгийн чиглэлээр тодорхой ахиц дэвшил гаргах шаардлагатай гэдгийг Засгийн газар анхаарах нь зүйтэй.
Түүнчлэн үндэсний аюулгүй байдлыг хангахад тусгайлсан чиг үүрэгтэй байгууллагуудын харилцан ажиллагааг шинэ түвшинд гаргах асуудал тулгамдаж байна. Нийтийг хамарсан гамшиг ослын үед Зэвсэгт хүчин, цагдаа, хүчний бусад байгууллага тус тусын үүргээ хамтарч гүйцэтгэх нөхцлийг тайван цагт бүрдүүлсэн байх шаардлагатайг гадаад орнуудад тохиолдож буй гамшгийн дараах сургамжаас бид харж байна. Гамшигтай тэмцэх, аврах ажиллагаанд олон улсын хамтын ажиллагаа, харилцан дэмжлэг туслалцаа ч нэн чухал. Гамшгаас хамгаалах талаарх төрийн бодлогыг хэрэгжүүлэх хүрээнд эдгээр асуудлуудыг байнгын анхааралдаа байлгаж ажиллахыг Та бүхэнд зөвлөж байна.
Манай онцгой байдлын асуудал эрхэлсэн байгууллага, аврагчид ард иргэдийн амь нас, эрүүл мэнд, эд хөрөнгийг хамгаалах амаргүй албандаа чин сэтгэлээрээ зүтгэж, үүргээ биелүүлж байгааг төрөөс зүй ёсоор үнэлж байдаг билээ.
Гамшгаас хамгаалах талаарх төрийн бодлогыг хэрэгжүүлэх, энэ үйл хэрэгт бүх нийтийн оролцоо, үүрэг хариуцлагыг өндөржүүлэхэд Онцгой байдлын асуудал эрхэлсэн байгууллага, түүний удирдлагын идэвхтэй үйл ажиллагаа нэн чухал юм.
Түмэн олныхоо аюулгүй амьдралын төлөө өргөсөн тангарагтаа үнэнчээр зүтгэж, мэргэжлийн ур чадвараа байнга дээшлүүлэн хүлээсэн үүргээ нэр төртэй биелүүлэх эрхэм үйлстээ их амжилт гаргахыг Та бүхэнд хүсэн ерөөе.
МОНГОЛ УЛСЫН ЕРӨНХИЙЛӨГЧ ЦАХИАГИЙН ЭЛБЭГДОРЖ
Улаанбаатар хот
2011 оны 6 дугаар сарын 16