\Монгол Улс, БНЭУ-ын Ерөнхийлөгчид уулзлаа\
БНЭУ-ын Ерөнхийлөгчийн урилгаар тус улсад Төрийн айлчлал хийж байгаа Монгол Улсын Ерөнхийлөгч Цахиагийн Элбэгдорж, БНЭУ-ын Ерөнхийлөгч хатагтай Пратибха Дэвисингх Патил-тай уулзлаа.
Дэлхийн хамгийн том ардчилал болсон Энэтхэг улсаас энэ айлчлал эхэлж байгаад нэн бэлэгшээж байгаа гэдгийг Ерөнхийлөгч Ц.Элбэгдорж ярианыхаа эхэнд онцоллоо. Монгол Энэтхэгийн шинэ үеийн харилцаа 1994 оны Найрсаг харилцаа хамтын ажиллагааны тухай гэрээний үндсэн дээр амжилттай өргөжин хөгжиж байгаад сэтгэл хангалуун байдгаа илэрхийлсэн.
Ерөнхийлөгч, Энэтхэг бол манай улс төр, стратегийн төдийгүй эдийн засгийн гол түнш орнуудын нэг болох ирээдүйтэй. Хоёр тал цаашид нөөц боломжоо дайчлан хамтын ажиллагааны шинэ шинэ салбаруудыг нээж, ялангуяа, худалдаа хөрөнгө оруулалтыг нэмэгдүүлэх явдал чухал байна гээд, уул уурхай, мэдээллийн технологийн салбарын хамтын ажиллагааг далайцтай нэмэгдүүлэх зорилт тавьж ажиллахыг санал болголоо. Тухайлбал, уран зэрэг эрчим хүчний салбарт Энэтхэгийн оролцоо, хамтын ажиллагааг дэмжиж ажиллах болно гэдгээ илэрхийлсэн юм.
“Хөдөө аж ахуйн салбар манай хоёр орны харилцаанд томоохон үүрэг гүйцэтгэдэг. Энэтхэг бол “цагаан хувьсгал” өрнүүлсэн туршлагатай. Сүүлийн 2 жилд Энэтхэгээс сүү боловсруулах тоног төхөөрөмж авах, туршлага судлах зэрэг харилцааны эхлэл тавигдаж байгаа нь сайн хэрэг юм. Энэтхэгийн туршлага чадвартай хослуулан монголын хөдөө аж ахуйд харилцан ашигтай хамтын ажиллагааг эхлүүлэх боломж бидэнд бий. Монгол Улсын эдийн засгийн хүндрэлийг ойлгож, тусламж хөнгөлөлттэй зээл олгох талаар анхаарч байдагт Эрхэмсэг хатагтай Ерөнхийлөгч танд талархал илэрхийлье. Бид цаашид тусламж авах бодлогоосоо аажим гарч, хөнгөлөлттэй зээл авч, аль болох харилцан ашигтай хамтын ажиллагааг хөгжүүлэх шатанд ажиллахыг зорьж байна. Хүн төрөлхтөнийг бүхэлд нь түгшээж байгаа дэлхийн дулаарал, цаг уурын өөрчлөлт манай орныг ч тойрч гарахгүй байна. Цөлжилтийн талаар судалгаа туршилт хийж, мэдээлэл аргачлал солилцох зэргээр хамтран ажиллаж болох юм. Байгальд ээлтэй технологи нэвтрүүлэх, тэр дундаа сэргээгдэх эрчим хүч ашиглах талаар Энэтхэг Улс сүүлийн жилүүдэд ихээхэн урагшилж байгаа. Нарын эрчим хүчээр ажиллах энэтхэгийн технологийн станцийг Монголд суурилуулсан нь хэвийн ажиллаж байгаа. Цаашдаа байгаль хамгаалах үүднээс энэ салбар, харилцааны тэргүүн эгнээд түрэн гарч ирэх нь мэдээж байна” гэж МУ-ын Ерөнхийлөгч ярилаа.
БНЭУ-ын Ерөнхийлөгч, хатагтай Пратибха Дэвисингх Патил анхны гадаад айлчлалаа Энэтхэг улсаас эхлүүлж байгаад нь Ерөнхийлөгч Ц.Элбэгдоржид талархлаа илэрхийлээд, айлчлал үр дүнтэй болж байна гэж үзэж байгаагаа хэллээ. “Бидний түүх, соёл болон оюун санааны хэлхээ холбоо, хамтын ажиллагаа шинэ агуулгаар баяжигдаж байгаад сэтгэл хангалуун байна. Уламжлалт сайн харилцаа бүхий салбаруудаас гадна, уул уурхай цөмийн эрчим хүч, батлан хамгаалах аюулгүй байдлын салбаруудад хамтран ажиллах шинэ боломжууд гарч ирж байгаад баяртай байна” гэж хатагтай Пратибха Дэвисингх Патил хэллээ.
Хоёр орны Ерөнхийлөгч хоер талын харилцааны асуудлаар тоймлон хэлэлцлэж, бүс нутгийн болон олон улсын харилцан сонирхсон асуудлаар санал бодлоо солилцлоо.
Ерөнхийлөгч Ц.Элбэгдорж, БНЭУ-ын Ерөнхийлөгч хатагтай Пратибха Дэвисингх Патилыг тааламжтай цагтаа Монгол Улсад айлчлахыг урив.
Мэдээтэй холбоотой зарим баримтууд:
БНЭУ-ын Ерөнхийлөгч хатагтай Пратиба Дэвисингх улсынхаа Ерөнхийлөгчөөр сонгогдсон анхны эмэгтэй бөгөөд, 2007 оны 7-р сард эрх баригч Үндэсний конгресс намаас сонгогдож байжээ. Тэрээр 1934 онд төрсөн, Мумбай хотын Хуулийн коллежийг эрх зүйч мэргэжлээр төгсөж, эдийн засаг болон улс төр судлалын магистрын зэрэг хамгаалжээ. Анх 27 настайдаа Махараштра мужийн сонгуульд оролцож, 4 удаа мужийн хуралд сонгогдон, улс төр, соёл нийгмийн хүрээний олон ажлыг удирдан зохион байгуулж байжээ. Эрүүл мэндийн сайд, Нийгмийн аюулгүй байдлын сайд, Соёлын сайд, Боловсролын сайд, Хот байгуулалтын сайд, Парламентын дээд танхимын гишүүн, орлогч дарга, Парламентын доод даргын гишүүн зэрэг өндөр албан тушаал хашиж байсан.
БНЭУ-д Ерөнхийлөгчийг парламентаас сонгодог.
Монгол Улсын Ерөнхийлөгч 1994 онд , Н.Багабанди 2001 онд БНЭУ-д, Энэтхэгийн Ерөнхийлөгч Р.Венкатараман 1988 онд Монгол Улсад айлчилж байсан байна. 2010 онд манай хоёр орны хооронд дипломат харилцаа тогтоосны 55 жилийн ой тохиох юм.