Литва Улсын нийслэл Вильнюс хотноо болж буй Ардчилсан орнуудын хамтын нийгэмлэгийн бага хурал ардчиллыг хамгаалах, бэхжүүлэх, тулгарч буй сорилтуудыг даван туулах үзэл санаан дор амжилттай үргэлжилж байна.
Өнөөдөр энэхүү бага хурлын хамгийн анхаарал татсан өдөр байлаа. Учир нь Ардчиллын хамтын нийгэмлэгийг даргалах эрхийг шилжүүлэх ёслол болсон юм.
1990 онд нийгмийн тогтолцоогоо өөрчилж, тусгаар тогтнолоо зарласан Литва Улсын ардчиллыг хөгжүүлж буй замнал нь бүс нутагтаа үлгэр жишээ болдог билээ. Тиймээс ч, 2 жилийн өмнө Ардчиллын хамтын нийгэмлэгийг даргалах үүргийг хүлээн авч байсан юм.
Литва Улсын Ерөнхийлөгч Далиа Грибаускайте нээлтийн хуралдааны үеэр хэлэхдээ “ Бид 2 жилийн өмнө, Хамтын нийгэмлэгийг илүү үр бүтээлтэй, идэвхитэй ажиллуулах , мөн нийгмийн янз бүрийн бүлгийн идэвхийг нэмэгдүүлэх, тэдгээрийн дотор залуучууд, эмэгтэйчүүд, төрийн бус байгууллага, бизнесийн төлөөллийг үйл ажиллагаандаа идэвхитэй татан оролцуулах, иргэдийн сайн дурын санаачилга, оролцоог дэмжих гэсэн үндсэн зорилтууд тавьж байлаа. Өнөөдөр энэхүү зорилгодоо хүрсэн гэж үзэж байна. Энэ үүргийг амжилттай үр дүнтэй биелүүлэхийг Монгол Улсад хүсэн ерөөе ” гэсэн юм.
АНУ-ын Төрийн нарийн бичгийн дарга Хиллари Клинтон “ Ардчиллын хамтын нийгэмлэгийг даргалах хариуцлагатай, нэр хүндтэй үүргийг Монгол Улс амжилттай биелүүлнэ гэдэгт итгэлтэй байна” гэлээ.
Литва Улсын Гадаад хэргийн сайд А.Азулус “Ардчиллыг амжилттай хөгжүүлж байгаа Монгол Улсад энэ үүргийг хүлээлгэн өгч байгаадаа баяртай байна. Монгол Улс Ардчилсан орнуудын хамтын нийгэмлэгийн үйл ажиллагааг идэвхтэй, үр дүнтэй удирдана гэдэгт итгэж байна” гэлээ.
Тэрээр Ерөнхийлөгч Ц.Элбэгдоржид Ардчиллын хамтын нийгэмлэгийн тугийг гардуулан өглөө.
Дараа нь Монгол Улсын Ерөнхийлөгч Ц.Элбэгдорж, Литва Улсын Гадаад хэргийн сайд А.Азулус нар хэвлэлийн бага хурал хийж, сэтгүүлчдийн асуултад хариуллаа.
Ерөнхийлөгч Ц.Элбэгдорж, Монгол Улс Ардчиллын хамтын нийгэмлэгийг удирдахдаа дараах зарчмуудыг баримталж ажиллана гэв. Юуны өмнө иргэний оролцоог чухалчилж, ардчиллын гол шалгуур болсон шударга ёсыг бэхжүүлэх, шүүхийн тогтолцоог сайжруулах хэрэгтэй.
Түүнчлэн төрийн бус байгууллагыг бэхжүүлэх, ардчиллын ирээдүйн баталгаа болсон ардчиллын боловсролын тогтолцоог бэхжүүлэх зэрэг асуудалд анхаарахаа мэдэгдлээ. Мөн дэлхий дээрх олон оронд ардчилал бүтэлгүйтэх гол шалтгаан болсон авилга, хээл хахуулийн асуудлыг онцгой анхаарч ажиллана гэдгээ Ерөнхийлөгч Ц.Элбэгдорж хэллээ. Тэрээр аливаа нийгмийн шинэчлэгч хүч болсон оюутан залуучуудын оролцоог анхаарч, Ардчиллын хамтын нийгэмлэгийг даргалах хугацаандаа оюутнуудын тусгайлсан хөтөлбөр, чуулганыг хийх санал гаргасныг бага хуралд оролцогчид талархан хүлээн авч дэмжив.
Ардчиллын хамтын нийгэмлэгийн үйл ажиллагаагаа чиглүүлж байгаа гол бүлэг болох эмэгтэйчүүд, залуучууд, төрийн бус байгууллагууд, бизнес эрхлэгчдидтэй хамтын ажиллагаагаа улам өргөжүүлэх болно гэдгээ шинэ үүрэг хүлээн авсан орны Төрийн тэргүүн хэлж байна.
Бага хурлын үеэр шинэ үүрэгтэй холбоотой эхний ажил хэрэгч ярианууд өрнөлөө. Тухайбал, Ардчиллын хамтын нийгэмлэгийг удирдаж байсан туршлагаа Литвийн Ерөнхийлөгч хэлж,. ардчилал судлалын тэргүүлэх судлаач болох нэрт эрдэмтэн Ларри Даймонд Ерөнхийлөгчтэй тусгайлан уулзаж хамтын нийгэмлэгийг даргалах үүрэгт ажилд нь амжилт хүсч, хамтын нийгэмлэгийн үйл ажиллагааг идэвхжүүлэх чиглэлээр санал бодлоо солилцлоо.
Мөн Ерөнхийлөгч Ц.Элбэгдорж, Ардчиллын төлөөх үндэсний сангийн Ерөнхийлөгч К.Гейшман, Ардчиллын төлөөх дэлхийн хөдөлгөөний Ерөнхийлөгч, Канадын Ерөнхий сайд асан Ким Кэмпэл нартай уулзаж, ардчиллыг бэхжүүлэх чиглэлээр ярилцлаа.