БНХАУ-ын Төрийн Зөвлөлийн гишүүн, Нийгмийг аюулаас хамгаалахын сайд Мэн Зяньжу Монгол Улсын Үндэсний аюулгүй байдлын зөвлөлийн нарийн бичгийн дарга Ц.Энхтүвшингийн урилгаар 2011 оны 7 дугаар сарын 6-8-нд Монголд албан ёсоор айлчлах юм байна. Энэ үеэрээ Монгол Улсын Ерөнхийлөгч Ц.Элбэгдоржид Мэн Зяньжу сайд бараалхаж, Үндэсний аюулгүй байдлын зөвлөлийн нарийн бичгийн дарга Ц.Энхтүвшинтэй хоёр улсын хооронд стратегийн түншлэлийн харилцааг дотоод, гадаад аюулгүй байдлын агуулгаар баяжуулан хөгжүүлэх өргөн хүрээтэй асуудлуудаар ажил хэрэгч яриа хэлэлцээ хийх ажээ.
Мөн Монгол Улсын Засгийн газар, БНХАУ-ын Засгийн газар хооронд Гэмт хэрэгтэй тэмцэхэд хамтран ажиллах тухай хэлэлцээр байгуулах бөгөөд БНХАУ-ын Засгийн газраас Цагдаагийн ерөнхий газар, Хил хамгаалах ерөнхий газар, Шүүхийн шийдвэр гүйцэтгэх ерөнхий газар, Онцгой байдлын ерөнхий газарт нэг тэрбум орчим төгрөгийн техникийн тусламж үзүүлэх тухай ноот бичиг солилцох юм байна.