Монгол Улсын Ерөнхийлөгч Ц.Элбэгдорж зарлиг гарган, Монголын Тулгар төрийн 2220 жилийн ой, Их Монгол Улс байгуулагдсаны 805 жилийн ой, Үндэсний эрх чөлөөний хувьсгалын 100 жилийн ой, Ардын хувьсгалын 90 жилийн ойн болон Үндэсний Их баяр наадмын хүчит бөхийн барилдаанд тав давсан Увс аймгийн Хяргас сумын харьяат, “Хүч” спорт хорооны Сүхбаатарын Батсуурь, Ховд аймгийн Чандмань сумын харъяат “Сүлд” спорт хорооны Чулуунбаатарын Цогбаяр, Говь-Алтай аймгийн Бигэр сумын харъяат, “Хичлин” спорт хорооны Саруултуяагийн Багахүү, Хөвсгөл аймгийн Төмөрбулаг сумын харъяат, “Сүлд” спорт хорооны Маналсүрэнгийн Эрдэнэбат, Баянхонгор аймгийн Бууцагаан сумын харъяат, “Сүлд” спорт хорооны Жаргалсайханы Чулуунбат, Өмнөговь аймгийн Булган сумын харъяат “Ажнай” клубын Баатарын Сумъяа, Архангай аймгийн Чулуут сумын харъяат, “Алдар” биеийн тамир спортын хорооны Баатарын Амарзаяа, Завхан аймгийн Идэр сумын харъяат, “Шинэ Ази” группын Ширбазарын Жаргалсайхан, Хөвсгөл аймгийн Цагаан-Үүр сумын харъяат, “Сүлд” спорт хорооны Амарын Батмөнх, Өвөрхангай аймгийн Тарагт сумын харъяат, “Их монголын хүчтэн” дэвжээний Батмөнхийн Сангисүрэн, Төв аймгийн Баянхангай сумын харъяат, Иргэгний нисэхийн ерөнхий газрын Батзоригийн Батмөнх, Завхан аймгийн Их-Уул сумын харъяат, “Алдар” спорт хорооны Батнасангийн Гончигдамба, Өмнөговь аймгийн Ханхонгор сумын харъяат, “ОБ капитал” компанийн Цэдэнбазарын Одбаяр нарт Улсын начин цол, зургаа давсан Дорноговь аймгийн Эрдэнэ сумын харъяат, “Хутагтын хүчтэн” дэвжээний Алтанбаганын Цацабшир, Ховд аймгийн Мянгад сумын харъяат, Дотоодын цэргийн 805-р ангийн Ганбатын Алтангэрэл, Хөвсгөл аймгийн Тосонцэнгэл сумын харъяат, Хил хамгаалах ерөнхий газрын 0108 дугаар ангийн Цэдэвийн Содномдорж, Сэлэнгэ аймгийн Орхонтуул сумын харъяат, “Алдар” спорт хорооны Түвдэндоржийн Өсөх-Ирээдүй нарт Улсын харцага цол, долоо давсан Булган аймгийн Бүрэгхангай сумын харъяат, Хил хамгаалах ерөнхий газрын 0108 дугаар ангийн Дашзэвэгийн Баасандорж, Архангай аймгийн Хашаат сумын харъяат, “Хангарьд” спорт хорооны Чимэдрэгзэнгийн Санжаадамба нарт Улсын заан цол, найм давсан Говь-Алтай аймгийн Цээл сумын харъяат, Хил хамгаалах ерөнхий газрын 0131-р ангийн Жанцангийн Бат-Эрдэнэ, Завхан аймгийн Идэр сумын харъяат, “Эр” спорт хорооны Махгалын Баяржавхлан нарт Улсын гарьд цол, ес давсан Сэлэнгэ аймгийн Мандал сумын харъяат, “Сүлд” спорт хорооны Гунаажавын Эрхэмбаяр, Увс аймгийн Баруунтуруун сумын харъяат, “Уурхайчин” дэвжээний Сүхбаатарын Мөнхбат нарт Улсын арслан цол, арав давсан Увс аймгийн Баруунтуруун сумын харъяат, “Уурхайчин” дэвжээний Сүхбаатарын Мөнхбатад Улсын аварга цол олгон, түрүүлсэн болон үзүүрлэсэн бөхчүүдэд бай шагналыг нь гардуулан өгч, баяр хүргэлээ.
Мөн баяр наадмын Үндэсний сурын харваанд эрэгтэйчүүдээс түрүүлсэн Завхан аймгийн Дөрвөлжин сумын уугуул, Орхон аймгийн “Хангарьд” спорт клубын харваач Баасанхүүгийн Ёндон, эмэгтэйчүүдээс түрүүлсэн Хэнтий аймгийн Дадал сумын уугуул, Төв аймгийн “Мандуухай цэцэн” компанийн харваач Холхорын Оюунчимэг нарт Монгол Улсын мэргэн цол олголоо.
Баяр наадмын хүчит бөхийн барилдааны дундуур хурдан морины уралдаанд түрүүлсэн, үзүүрлэсэн, айргийн тавд орсон морьдын унаач хүүхдүүдэд Ерөнхийлөгч бэлэг гардуулав.
Үндэсний Их баяр наадам өргөн дэлгэр болж, Монгол Улсын Ерөнхийлөгч Ц.Элбэгдорж хааж үг хэллээ.