Сэлэнгэ аймаг байгуулагдсаны 80 жилийн ойд
Эрхэм хүндэт Сэлэнгэчүүд ээ,
Монголын Тулгар төрийн 2220 жил, Их Монгол Улс байгуулагдсаны 805 жил, тусгаар тогтнолоо сэргээн тогтоосон Үндэсний эрх чөлөөний хувьсгалын 100 жил, Ардын хувьсгалын 90 жилийн ой тус тус нийцэн тохиосон билэгдэл төгс түүхэн онд аймаг байгуулагдсаны 80 жилийн ойгоо тэмдэглэж буй Сэлэнгэ нутгийн нийт иргэддээ чин сэтгэлийн мэндчилгээ дэвшүүлж халуун баяр хүргэе.
Сэлэнгэчүүд бол өвөг дээдсээсээ эх орнынхоо эрх чөлөө, тусгаар тогтнолын төлөө, тууштай тэмцэж ирсэн баатарлаг түүхтэй, хөдөлмөрч бүтээлч уламжлалтай эх орноо хөгжүүлэхэд жинтэй хувь нэмэр оруулдаг Монгол Улсын шилдэг аймгийн алдар хүндийг сүүлийн 10 шахам жил дараалан хүртсэн бахархалт түүхтэй гэдгийг баярын энэ өдөр тэмдэглэн хэлэхэд таатай байна.
Үржил шимт Орхон Сэлэнгийн сав газарт Тариалангийн аймаг нэртэй, анх байгуулагдсан Сэлэнгэ аймгийн иргэд, шинэ Монгол Улсын их бүтээн байгуулалт, олон улсын төмөр зам, цардмал зам барьж байгуулах, мод боловсруулах, Монгол шүдэнз, гурил, тэжээл, спирт бал бурамын анхдагч үйлдвэрүүдийг ашиглалтанд оруулахад хошуучлан оролцож, Атрын гурван удаагийн аяныг гардан хэрэгжүүлж үр тариа, хүнсний ногоогоор эх орон, Монгол түмнээ хангах үйлсийг манлайлж байна.
Сэлэнгэчүүд хөгжил дэвшлийнхээ энэ үед улсын хэрэгцээт үр тарианы 60 хувь, төмсний 30, хүнсний ногооны 40 шахам хувийг үйлдвэрлэж хүн амын хүнсний гол хэрэглээ гурилын түүхий эд буудай үйлдвэрлэлтээр улсад тэргүүлж төмс, хүнсний ногоо малын тэжээлийн ургамал тариалалтаар хоёрдогч байр суурийг эзэлж аж үйлдвэр, барилга үйлчилгээний салбар эрчтэй хөгжсөн, эдийн засаг санхүүгийн хувьд бүрэн бие даагаад жил бүр 10 гаруй тэрбум төгрөг улсад төвлөрүүлдэг цөөхөн аймгийн нэг болсон юм.
Аймаг, орон нутгаа хөгжүүлэх их үйлсэд амжилт олж, эх орныхоо хөгжилд оруулсан дорвитой хувь нэмрээ Монгол төрөөр үнэлүүлж Хөдөлмөрийн гавъяаны улаан тугийн одонг хоёр удаа хүртсэн Сэлэнгэчүүдэд Монгол Улсад Атар газар эзэмшсэний 50 жилийн ойг тохиолдуулан эх орон, ард түмнээ баталгаат хүнсээр хангах их үйлсийг манлайлж ирснийг нь Монгол Улсын Ерөнхийлөгч өндрөөр үнэлж 2009 онд Монгол төрийн дээд шагнал Сүхбаатарын одонг хүртээсэн билээ.
Аймаг байгуулагдсаны 80 жилийн ойгоо ёслол төгөлдөр тэмдэглэж байгаа төрийн гурван одонт Сэлэнгэ аймгийн ард иргэд Та бүхэн өвөг дээдэс, ахмад үеийнхээ уламжлалыг түүчээлэн үргэлжлүүлж, аймаг орон нутгаа дэд бүтцийн хөгжил, хүн ардынхаа хөдөлмөрч хичээнгүй, шинийг эрэлхийлэгч, бүтээлч уламжлалд тулгуурлан өндөр хөгжсөн аж үйлдвэртэй, эрчимжсэн мал аж ахуй, газар тариаланг загвар хэмжээнд хослуулсан, байгаль экологийн тэнцвэрт байдлыг хадгалсан хүний хөгжилд таатай бүс нутаг болгоно гэдэгт миний бие итгэж байна.
Шударга ёсыг бэхжүүлж, хүн ардын сайн сайхан амьдралын баталгааг хангахад нутгийн удирдлага ч, иргэд олон нийт ч адилхан анхаарал тавьж хариуцлага хүлээх учиртай. Иргэдийнхээ нийтлэг эрх ашгийг дээдэлж, нутаг орныхоо амин чухал асуудлуудыг иргэдийнхээ идэвхтэй оролцоотойгоор шийдвэрлэдэг ил тод, хариуцлагатай сайн засаглалыг хөгжүүлэхийн төлөө харилцан хүчин чармайлт тавьж, улам хичээж ажиллахыг Сэлэнгэ нутгийн удирдлага, нийт иргэддээ уриалж байна.
Та бүхний хичээнгүй хөдөлмөр, чин сэтгэлийн хүчин чармайлтын үрээр Монголын түүхийн домогт өлгий нутаг Сэлэнгэ аймаг цаашид улам цэцэглэн хөгжих болтугай.
Сэлэнгэчүүд Та бүхэнд аз хийморь амжилт бүтээлийн дээдийг билэгдэн эрүүл энх, инээд баясал тэгш дүүрэн наадахын ерөөл дэвшүүлж сайн сайхныг хүсье.
МОНГОЛ УЛСЫН ЕРӨНХИЙЛӨГЧ ЦАХИАГИЙН ЭЛБЭГДОРЖ