Монгол Улсын Ерөнхийлөгч Ц.Элбэгдорж Норвегийн Вант Улсын Цог Жавхлант Ван Тавдугаар Харалдад эмгэнэл илэрхийлсэн цахилгаан утас илгээлээ. Цахилгаан утсанд: “Норвегийн Вант Улсын нийслэл Осло хотод 2011 оны 7 дугаар сарын 22-нд гэмт этгээд бөмбөг дэлбэлж, Утояа аралд энгийн иргэд, түүний дотор олон тооны хүүхэд залуучуудын амийг хөнөөсөн, шархдуулсан цуст халдлага үйлдсэн туйлын харамсалтай хэрэг болсонд Цог Жавхлант Ван, Танд, танаар уламжлан амь үрэгдэгсдийн гэр бүл болон норвегийн ард түмэнд гүн эмгэнэл илэрхийлье.
Ардчилал, чөлөөт сонголт, амар тайван амьдралыг бусниулахаар санаархагчийн хүчирхийлэл, аллага хядлага Норвегийн ард түмнийг айлган сүрдүүлж чадахгүй гэдэгт итгэлтэй байна.
Афганистанд энхийг тогтоох, олон улсын терроризмын эсрэг тэмцэх үйлсэд идэвхтэй оролцож ирсэн Норвеги улсын засгийн газар, ард түмний тууштай хүчин чармайлтыг Монголын ард түмэн цаашид ч дэмжиж ажиллах болно” гэсэн байна.
