Монгол Улсын Ерөнхийлөгчийн урилгаар манай оронд айлчилж байгаа Бүгд Найрамдах Финланд Улсын Ерөнхийлөгч Эрхэмсэг хатагтай Тарьяа Халонен, Монгол Улсын Ерөнхийлөгч Цахиагийн Элбэгдорж нар уулзлаа. Ерөнхийлөгч Ц.Элбэгдорж, хатагтай Тарьяа Халоненд Монгол Улсын Ерөнхийлөгчийн урилгыг хүлээн авч хүрэлцэн ирсэн талархаж байгаагаа илэрхийлээд, энэхүү айлчлал нь түүхэн чухал олон сайхан ойгоо тэмдэглэж байгаа монголчуудад үзүүлж байгаа гүн хүндэтгэл хэмээн үзэж байгаагаа хэллээ.
“Эрхэм Ерөнхийлөгч Таны хүний эрх , эрх чөлөөний төлөө тууштай тэмцэгч, ардчиллыг бэхжүүлэн, засаглалыг нээлттэй ил тод байлгах, хүйсийн тэгш эрхийг хангах, байгал орчныг хамгаалах чиглэлээр дэлхий дахинд танигдсан нэр хүндийг монголчууд бахархан хүндэтгэж байдаг юм. Та бидний өнгөрсөн жил Хельсинк хотноо уулзах үеэр хийгдсэн хоёр орны хамтын ажиллагааг хөгжүүлэх талаархи яриа хэлэлцээ ажил хэрэг болж байгаад би баяртай байна” гэлээ.
Ерөнхийлөгч Тарьяа Халонен элэгсэг дотноор хүлээн авч байгаад талархаад, хүний эрх эрх чөлөөг дээдэлсэн, ардчиллыг бэхжүүлсэн, хууль шударга ёсыг эрхэмлэсэн нийтлэг үнэлэмжтэй Монгол Улсад айлчлан ирж байгаадаа баяртай байна гэлээ.
Тэрээр “Монгол Улс Ардчилсан орнуудын хамтын нийгэмлэгийг тэргүүлэх болсон нь өндөр нэр хүнд хариуцлага юм. Танай улс бүс нутагтаа төдийгүй дэлхий дахинд ардчиллын үлгэр жишээ болж байгааг энэхүү түүхэн үүрэг хариуцлага нотолж байна. Монгол орны эдийн засаг тогтмол өсч, хүний эрхийг баталгаажуулах, уур амьсгалын өөрчлөлтөөс үүдсэн сөрөг нөлөөллийг бууруулах чиглэлээр ахиц дэвшилтэй, санаачилгатай ажиллаж байгаад баяр хүргэе” гэсэн юм.
Ерөнхийлөгч Ц.Элбэгдорж зарим орны Төрийн тэргүүн нартай хамтран ардчиллын боловсролын асуудлаар санаачилга гаргаж, бүлэг байгуулахаар санал солилцож байгаагаа хэлээд, энэхүү санаачилгад нэгдэх саналыг Финландын Ерөнхийлөгчид тавилаа. Ерөнхийлөгч Т.Халонен, Төрийн тэргүүн нарыг уриалах энэхүү санаачилга нь ардчиллын боловсролын асуудалд дэлхий нийтийн анхаарлыг хандуулахад чухал санаачилга болно гээд, бүрэн дүүрэн дэмжиж байгаагаа илэрхийлэв.
Хоёр Ерөнхийлөгч харилцаа хамтын ажиллагааны зарим тодорхой асуудлуудаар санал солилцсон. Тухайлбал Ерөнхийлөгч Ц.Элбэгдоржийн хүсэлтийн дагуу цаа бугыг хамгаалах, үржүүлэх чиглэлээр хамтын ажиллагааны эхлэл тавигдаж байгааг хатагтай Тарьяа Халонен ярив. Тэрээр мөн монголын эмэгтэйчүүдийн шийдвэр гаргах түвшин дэх оролцоог сонирхож, энэ чиглэлд хэрэгжүүлж байгаа бодлогын талаар асууж байсан.
Уулзалт нөхөрсөг дотно уур амьсгалд болж өнгөрлөө.