Монгол Улсын Ерөнхийлөгч Ц.Элбэгдорж АНУ-ын Ерөнхийлөгч асан Билл Клинтонтой Нью-Йорк хотноо хоёр талын уулзалт хийлээ.
Ерөнхийлөгч асан Билл Клинтон, Clinton Global Intitaive буюу “Клинтоны дэлхийн санаачлага”-ыг дэвшүүлсэн бөгөөд, сүүлийн 5 жил энэ хүрээнд төрөл бүрийн уулзалтуудыг амжилттай зохион байгуулж байна.
Уулзалтын эхэнд Ерөнхийлөгч Ц.Элбэгдорж , энэ санаачлага амжилттай хэрэгжиж байгаад баяр хүргээд, НҮБ-ын Ерөнхий Ассамблейн 64 дүгээр чуулганы үеэр болж буй “ Клинтоны дэлхийн санаачилга”-ын уулзалтаар дэд бүтэц, хүний нөөцийг хөгжүүлэх асуудлаар дэлхийн олон улс орны тэргүүн, иргэний нийгмийн зүтгэлтнүүд болон бизнесийн салбарыхан санал бодлоо солилцож, үнэтэй зөвлөмж гаргана гэдэгт итгэлтэй байгаагаа илэрхийлэв. Монгол улс, АНУ-ыг Гурав дахь хөршөө хэмээн үздэгийг Ерөнхийлөгч дахин нотлоод, Монгол Улсад ардчиллыг бэхжүүлэхэд, АНУ-ын үзүүлж ирсэн тусламж дэмжлэг чухал үүрэг гүйцэтгэж байгааг онцоллоо. Цаашид хоёр талын харилцааг өргөжүүлж, шинэ шатанд гаргах сонирхолтой байгааг Ерөнхийлөгч илэрхийлж, Ерөнхийлөгч Б.Обамагийн Засаг захиргаатай нягт хамтран ажиллах суурь тавигдаж байгааг мөн дурдсан юм.
Монгол Улс, ардчилсан өөрчлөлт шинэчлэлийн загвар болж, бүс нутагтаа үлгэр дууриал болж ирснийг Ерөнхийлөгч асан Билл Клинтон тэмдэглээд, хоёр талын харилцаа, хамтын ажиллагааг өргөжүүлэн хөгжүүлэх үйлст өөрийн зүгээс идэвхтэй ажиллахаа нотлон хэллээ. “Клинтоны дэлхийн санаачлага”-ын хүрээнд хамтран ажиллах өргөн нөөц бололцоо байгаа гэж тэрээр онцолсон. Төрийн нарийн бичгийн дарга Хиллари Клинтон Тэргүүн хатагтай ахуйдаа Монгол Улсад хийсэн айлчлалынхаа талаар халуун дотно сэтгэгдэлтэй үлдсэн бөгөөд, түүнийг Монгол Улсад айлчлахыг сануулдаг гэж ярилаа. Ерөнхийлөгч Ц.Элбэгдорж Билл Клинтоныг тааламжтай цагтаа Монгол Улсад айлчлахыг урив.
Ерөнхийлөгч Ц.Элбэгдорж өнөөдөр, “Клинтоны дэлхийн санаачлага”-ын 5 дугаар уулзалтын хүрээнд болох “Дэд бүтцийн хөгжлийг бэхжүүлэх” сэдэвт нэгдсэн хуралдаанд оролцож саналаа илэрхийлнэ.