Монгол Улсын Ерөнхийлөгч Ц.Элбэгдоржид Арабын Бүгд Найрамдах Сири Улсаас Монгол Улсад суух Онц бөгөөд Бүрэн эрхт Элчин сайд Халаф Аль-Жарад, Бүгд Найрамдах Беларусь Улсаас тус улсад суух Онц бөгөөд Бүрэн эрхт Элчин сайд Буря Виктор Павлович, Мьянмарын Холбооны Бүгд Найрамдах Улсаас тус улсад суух Онц бөгөөд Бүрэн эрхт Элчин сайд У Тин Оо, Палестин Улсаас тус улсад суух Онц бөгөөд Бүрэн эрхт Элчин сайд Ахмед Аббас Махфуз Рамадан нар өнөөдөр итгэмжлэх жуух бичгээ өргөн барилаа. Ерөнхийлөгч элчин сайд нарыг итгэмжлэх жуух бичгээ өргөн барьсантай нь холбогдуулан хүлээн авч уулзав.
Эртний түүхт Монгол Улсад элчин сайдаар ажиллах болсондоо баяртай байна. Монголын ардчиллын болон гадаадын хөрөнгө оруулалтыг татаж буй туршлагыг судалж, хоёр талын харилцааг бүрх түвшинд сайн байлгахын төлөө ажиллана гэж
Сирийн Элчин сайд Халаф Аль-Жарад хэллээ.
Беларусийн Элчин сайд Буря Виктор Павлович хоёр орны харилцааг шинэ түвшинд гаргахын төлөө ажиллахаа мэдэгдэх ялдамд Монгол, Беларусийн хооронд соёл, боловсролын гээд сэргээн хөгжүүлэх хамтын ажиллагааны өргөн боломж байгааг дурьдав.
Мьянмарын Элчин сайд У Тин Оо харилцан төлөөлөгчид солилцон, хөрөнгө оруулалтын салбарт хамтран ажиллах бодолтойгоо илэрхийллээ.
Харин Палестины Элчин сайд Ахмед Аббас Махфуз Рамадан монголчууд палестины ард түмний тэмцлийг дэмжиж ирсэнд баяртай байна гээд НҮБ-ын чуулганд Монгол Улсын Ерөнхийлөгчийн дэвшүүлсэн санал санаачилгыг дэмжиж байгаагаа мэдэгдэв.
Ерөнхийлөгч Ц.Элбэгдорж Элчин сайд нарт ажилд нь амжилт хүсээд хоёр талын харилцаа, хамтын ажиллагааг хөгжүүлэхэд хувь нэмрээ оруулна гэдэгт итгэж байгаагаа илэрхийллээ.
Монгол Улс Сиритэй 1967, Мьянмартай 1956, Беларусьтай 1992, Палестин1979 онд тус тус дипломат харилцаа тогтоосон байна.