Монгол Улсын Ерөнхийлөгчийн Тамгын газрын дарга Д.Баттулга Гадаад харилцааны яаманд өнөөдөр болж буй Монтрогийн баримт бичгийн талаарх Азийн бүсийн уулзалтын нээлтэд оролцон үг хэллээ. Тэрээр хэлэхдээ “Эрхэм хүндэт элчин сайд аа, хүндэт ССХ-ийн захирал аа, Эрхэм хүндэт хадагтай ноёд оо!
Та бүхэнд энэ өглөөний мэнд хүргэе. Бидний өнөөдрийн үйл ажиллагаанд цаг заваа гарган хүрэлцэн ирсэн бүх зочид, төлөөлөгчиддөө талархаж байгаагаа илэрхийлье. Ялангуяа өнөөдрийн үйл ажиллагаанд оролцохоор хол газраас зорьж ирсэн гадаадын зочиддоо талархал илэрхийлэн Монгол оронд тавтай морилно уу хэмээн урьж байна.
Монгол Улсын Ерөнхийлөгч Цахиагийн Элбэгдорж энэ оны нэгдүгээр сард Швейцарын Холбооны Улсад ажлын айлчлал хийх үеэрээ тус улсын Хөгжил, хамтын ажиллагааны агентлагийн удирдлагатай уулзан халуун дотно яриа өрнүүлж, санал солилцсон билээ. Энэ үеэрээ Монтрогийн баримт бичгийн талаарх Азийн бүсийн уулзалт, семинарыг Монголд зохион байгуулахаар анх ярилцсан юм. Ийнхүү Швейцарь, Монголын талын санаачилга, хүчин чармайлтын биелэл болж өнөөдрийн уулзалт, семинар эхэлж байна. "Монтрогийн баримт бичгийн талаарх Азийн бүсийн уулзалт, семинар"-ыг Швейцарын Засгийн газар, Олон улсын улаан загалмайн нийгэмлэг, Зэвсэглэлд ардчилсан хяналт тавих Женевийн төв болон Монгол Улсын Ерөнхийлөгчийн Тамгын газар, Гадаад харилцааны яам, Үндэсний аюулгүй байдлын зөвлөлийн Стратегийн судалгааны хүрээлэн хамтран зохион байгуулж байна.
Швейцарын талаас Монгол Улсын Ерөнхийлөгчид ийм хурал хамтран зохион байгуулах санал тавьж, энэ саналыг Монголын талаас талархан хүлээн авч бодит үйл хэрэг болгож байгаа нь тохиолдлын хэрэг биш юм.
Монгол Улс хориодхон жилийн өмнөөс хүний эрх, эрх чөлөө, шударга ёс, хууль дээдлэх зарчим, парламентын засаглалд суурилсан ардчилсан төрийн тогтолцоонд шилжсэн бөгөөд эдгээр зарчмын үндсэн дээр тусгаар тогтнол, аюулгүй байдлаа энх тайванч замаар, улс төр, дипломатын аргаар бүрэн хангаж чадсан. Ийм ч учраас Монголыг Ази тивдээ төдийгүй дэлхий дахины шилжилтийн орнууд дотор үлгэр жишээ ардчилсан улс хэмээн үнэлсэн байдаг.
Монгол Улс энхийг эрхэмлэсэн, бие даасан, нээлттэй, олон тулгуурт гадаад бодлогын зарчмыг эрхэмлэж, дэлхийн улс орнууд, олон улсын байгууллагуудтай идэвхтэй харилцаа, хамтын ажиллагааг хөгжүүлдэг. Ялангуяа өрнө дорнын өндөр хөгжилтэй, ардчилсан орнуудтай улс төр, эдийн засаг, соёл хүмүүнлэгийн салбарт өргөн хамтын ажиллагаа хөгжүүлэхээр зорьж байдгийн тэргүүн эгнээнд Швейцарын Холбооны Улс багтдаг.
Дэлхий дахинд энх тайван, эв нэгдлийг эрхэмлэж, хүч хэрэглэхээс зайлсхийх, бусад улсын хэрэгт хөндлөнгөөс оролцохгүй байх, аливаа цэрэг дайны зорилго бүхий эвсэл холбооноос ангид байх зарчмыг баримталдаг Швейцар Улсын бодлогыг бид талархан дэмждэг, зарим талаар үлгэр дууриал авахыг хичээдэг билээ. Бүр өнгөрсөн зууны эхэн үед Монголын нөлөө бүхий төрийн зүтгэлтэн Ж.Цэвээн "Монгол Улсын хөгжлийн зам үлгэрлэвэл Щвейцар лугаа адил" байх талаар санал гаргаж байсан баримт бий.
Ардчилал, зах зээлийн шилжилтийн хүнд жилүүдэд ч Швейцарын Засгийн газар бидэнд харамгүй тусалж байсан. Дэлхий дахинд энх тайван байдал тогтоох, хүний эрх, эрх чөлөөг бэхжүүлэхийн төлөө Щвейцарын гаргасан санал санаачилга бүрийг Монгол Улс талархан дэмждэгийн нэг илрэл бол өнөөдрийн уулзалт семинар юм.
Анх 2008 онд Швейцар улсын Засгийн газар, Олон улсын улаан загалмайн нийгэмлэг хамтран санаачилж дэлхийн 17 улс талархан дэмжиж хүчин төгөлдөр болсон Монтрогийн баримт бичигт өнөөдрийн байдлаар 36 улс, түүний дотор Төв болон Зүүн хойд Азийн хоёр улс нэгдээд байна. Үүнд нэгдэн орох нь бүх улс, олон улсын байгууллагуудын өмнө нээлттэй.
Монтрогийн Тунхаг нь зэвсэгт мөргөлдөөн гарч буй аливаа улсад хувийн арми, хамгаалалтын компани үйл ажиллагаа явуулахдаа олон улсын хүмүүнлэгийн хууль, хүний эрхийн тухай хуулийг чанд сахихыг уриалсан олон улсын баримт бичиг юм.
Хувийн цэрэг, хувийн хамгаалалт өнөөдөр Монголд төдийлөн өргөн дэлгэрээгүй, ийм төрлийн байгууллагын зохион байгуулалт, эрх зүйн зохицуулалт зэрэг нь манай нийгмийн нэн тулгамдсан асуудал биш боловч дэлхий ертөнцийн даяаршлын хурд, түүний ач холбогдол, улс орны хөгжлийн чиг хандлага талаас харвал ойрын ирээдүйд зайлшгүй анхаарал хандуулах ёстой зүйл мөн. Ийм учраас Монгол Улсын Засгийн Газар Монтрогийн баримт бичиг, түүний ач холбогдол, цар хүрээний талаар судлан үзэж, энэ чиглэлээр санаачлагч байгууллагуудтай цаашид ч нягт хамтран ажиллах эрмэлзэлтэй байгаа.
Өнөөдрийн энэ уулзалт семинарт Монгол Улс, Ази тивийн бусад олон орны улс төр, эрх зүй, батлан хамгаалах, аюулгүй байдлын салбарын өндөр албан тушаалтнууд, мэргэжилтэн, судлаачид оролцож, мэдээлэл, мэдлэг туршлагаасаа солилцон саналаа илэрхийлэх завшаан тохиолдож байгаад баяртай байна.
Ингээд уулзалт, семинарыг Монгол Улсын Ерөнхийлөгчийн Тамгын Газартай хамтран зохион байгуулж байгаа Монгол Улсын Гадаад харилцааны яам, Швейцарын Засгийн газар, Олон улсын улаан загалмай нийгэмлэг, Зэвсэглэлд ардчилсан хяналт тавих Женевийн төв, ҮАБЗ-ийн Стратегийн судалгааны хүрээлэн зэрэг байгууллагуудад дахин талархал илэрхийлье.
Өнөөдөр болон маргааш болох хурлын үйл ажиллагаанд хувиасаа болон Ерөнхийлөгчийн Тамгын газрын нэрийн өмнөөс амжилт хүсье” гэв.