Монгол Улсын Ерөнхийлөгч Ц.Элбэгдоржийн Бүгд Найрамдах Хорват Улсад хийж буй албан ёсны айлчлал хоёр дахь өдрөө үргэлжилж байна. Ерөнхийлөгч өнөөдөр тус улсын Парламентын дарга, ноён Лука Бебичийг хүлээн хүлээн авч уулзлаа. Ноён Лука Бебич, Монгол Улсын Ерөнхийлөгчийн энэхүү айлчлал нь зөвхөн Монгол Хорватын төдийгүй Ази Европын харилцаанд чухал үйл явдал болж байна гэж үзэж байгаагаа ярианыхаа эхэнд хэллээ.
“Манай Улсын Ерөнхийлөгч 2008 онд Монгол оронд айлчилж байсан бол энэ удаад Монголын Ерөнхийлөгч манай улсад айлчлан ирж байгаа нь хоёр орны харилцааг хөгжүүлэх ажил хэрэгч яриа хэлэлцээ идэвхижихэд чухал түлхэц болж байгаа нь дамжиггүй.
Хорватын парламент, Монголын Их хурлын хоорондын харилцааг идэвхижүүлэх нь хоёр орны харилцааг хөгжүүлэхэд нэг том тулгуур болох юм.
Саяхан Улаанбаатар хотод Хорват Улсын өргөмжит консул нээгдлээ. Монголын засгийн гаазар, гадаад харилцааны яам энэхүү шинэ Консулын үйл ажиллагааг дэмжиж, хамтран ажиллана гэдэгт итгэж байна.
Хорватад Монгол Улсын өргөмжит консулаар ажилладаг ноён З.Матеша бол улсынхаа Ерөнхий сайдаар ажиллаж байсан туршлагатай улстөрч, нэр хүндтэй хуульч хүн. Түүний идэвхитэй оролцоотойгоор бид нягт хамтран ажиллах болно” гэв
Ерөнхийлөгч Ц.Элбэгдорж найрсаг дотноор хүлээн авч байгаа Хорватын төр засаг, ард түмэнд талархал илэрхийлэв.
“Айлчлал эхэлсэн даруй Хорват Улсын Ерөнхийлөгч, эрхэмсэг ноён И.Иосиповичтой уулзаж, үр дүнтэй яриа хэлэлцээ хийлээ. Бидэнд бүх салбарт хамтран ажиллах сонирхол, боломж байна гэдгээ харилцан нотоллоо.
Хоёр орны хооронд дипломат харилцаа тогтоосноос хойшхи 20 орчим жилд манай хоёр орны найрсаг харилцаа хоёр орны ард түмний эрх ашигт нийцэн ардчиллын үнэт зүйлсэд тулгуурлан хөгжиж байна. Удахгүй танай улс Европын Холбооны гишүүн улс болох гэж байна. Энэ түүхэн нөхцөл байдал нь бидэнд харилцааны өргөн боломжийг нээх болно.
Парламент хоорондын харилцааг хөгжүүлэхэд харилцан төлөөлөгч солилцох, хамтын ажиллагааны баримт бичиг байгуулах нь чухал гэж үзэж байна. Иймээс эдгээр чиглэлд анхаарч ажиллахыг санал болгож байна.
Хорват Монгол нь хөдөө аж ахуй, малын эрүүл ахуй, хүнсний бүтээгдэхүүн үйлдвэрлэл, боловсрол, аялал жуулчлалын салбарт хамтран ажиллах боломжтой” гэж Ерөнхийлөгч хэлэв.
Монгол Улсын Ерөнхийлөгчийн айлчлалын хүрээнд харилцан тохирсон хамтын ажиллагааны тодорхой асуудлуудыг хоёр талын холбогдох байгууллагууд ажил хэрэг болгож, хамтын ажиллагаанд ахиц дэвшил гаргах нь чухал болохыг уулзалтын үеэр хоёр талаас тэмдэглэлээ.
Хорватын Парламент нь нэг танхимтай, 153 суудалтай. 4 жилд нэг удаа сонгууль болдог, пропорциональ системтэй. Энэ жилийн 11-р сард тус улсад парламентын сонгууль болох гэж байна.