Ерөнхийлөгчийн Тамгын газар Архидан согтуурахтай тэмцэх тухай хуулийн шинэчилсэн найруулгын талаар “Иргэний танхим”-д өнөөдөр хэлэлцүүлэг зохион байгууллаа.
Ерөнхийлөгчийн Тамгын газрын ахлах референт Г.Мөнхтулга хуулийн шинэчилсэн найруулгын талаар танилцуулахдаа “Тодорхой хэдэн зүйлээр, тухайлбал хуулийн шинэчилсэн найруулгад согтууруулах ундааг зөвхөн дагнасан цэгээр худалдах, зөвшөөрлийг нь сум, дүүргийн Засаг даргын санал, мэргэжлийн хяналтын байгууллагын дүгнэлтийг үндэслэн сонгон шалгаруулах үндсэн дээр аймаг, нийслэлийн иргэдийн төлөөлөгчдийн хурлаас олгох, цэгийн тоог тухайн орон нутагт 2500 хүнд нэгээс ихгүй, сумдад 2-оос дээшгүйгээр аймаг, нийслэлийн Засаг дарга тогтоох, цэгийг түрээслүүлэхгүй байх, 21 наснаас доош хүүхэд, залуучуудад болон согтуу хүнд үйлчлэхийг хориглох, зөрчвөл их хэмжээний торгууль ногдуулах, борлуулах бүтээгдэхүүний доод үнийг тогтоож өгөх, эрүүлжүүлэх байрыг Эрүүл мэндийн яаманд шилжүүлэх, 00-10 цагийн хооронд буудалд согтуурах ундаа хэрэглэх зорилгоор үйлчлүүлэхийг таслан зогсоох, баар, ресторанд зэрэглэл тогтоон цагийн хуваарийг ялгамжтай тогтоох, Архидалтын хор хөнөөлийг арилгах, түүнээс урьдчилан сэргийлэх зорилготой нэг бие даасан сантай байх гэх мэтээр тусгасан. Үүнтэй холбоотой та бүхний саналыг сонсохыг хүсч байна” гэв.
Оролцогчид “Цэгийн тооны асуудлыг эргэн хармаар байна. 200 000 хүн амтай дүүрэгт 80 цэг ажиллуулна гэдэг хэтэрхий олон юм биш үү. Боловсрол, эрүүл мэнд, нийгмийн хамгаалал хариуцсан яамдын саналыг сайн сонсохгүй бол наад төсөл чинь үр дүнгүй ажил болно. Баар гэдэг согтууруулах ундаа уудаг газар тул цөөлөмгүй байна. Учир нь архидалтыг бид ажлын байрнаас гаргасан. Одоо амьдрах орчин, ахуйгаасаа гаргамаар байна. Үйлдвэрүүдтэй хатуу тэмцэхгүйгээр борлуулах цэгт хатуурхаад асуудал шийдэхгүй болов уу. Зөвшөөрөл өгдөг газар нь хяналт тавьдаг болох хэрэгтэй. Албадан эмчилгээг албадан хөдөлмөр хийлгэхтэй хослуулахгүй бол тэд чинь хэсэг уугаад амарч сувилуулдаг газартай болчихоод байдал сайжрахгүй байна. Сангийн хөрөнгийг зөвхөн архины эмчилгээ, согтуурахаас урьдчилан сэргийлэхэд зориулна гэдгийн хуульчлах шаардлагатай. Тусгай зөвшөөрөл олгоход иргэний нийгэм, иргэдийн оролцоог нэмэгдүүлье. Дагнасан цэгийн үйлчилгээ хяналт тавихад хамгийн тохиромжтой тул дэмжиж байна. Баарыг нийслэлийн ИТХ-аас 04 цаг хүртэл ажиллуулдгийг болиулах хэрэгтэй. Ер нь баар, рестораны цагийн ялгааг арилгах нь зохистой бөгөөд 00 цагаас тэдний үйлчилгээг зогсоож байя. Зочид буудалд 00 цагаас хойш архидах асуудал үүсдгийг зогсоох эрх зүйн зохицуулалт бий болгомоор байна” гэхчлэн саналаа илэрхийлж байлаа.