Монгол Улсын Ерөнхийлөгч Ц.Элбэгдорж Монгол Улсын Үндсэн хуулийн гучин гуравдугаар зүйлийн 1 дэх хэсгийн 5, Монгол Улсын Ерөнхийлөгчийн тухай хуулийн 14 дүгээр зүйлийн 3, Дипломат албаны тухай хуулийн 16 дугаар зүйлийн 16.1 -д заасныг тус тус үндэслэн Монгол Улсаас Японы Улсад суух Онц бөгөөд Бүрэн эрхт Элчин сайдаар С.Хүрэлбаатар, Бүгд Найрамдах Энэтхэг Улсад суух Онц бөгөөд Бүрэн эрхт Элчин сайдаар С.Баяраа, Бүгд Найрамдах Сингапур Улсад суух Онц бөгөөд Бүрэн эрхт Элчин сайдаар Б.Дэлгэрмаа, Бүгд Найрамдах Ардчилсан Лаос Ард Улсад суух Онц бөгөөд Бүрэн эрхт Элчин сайдаар Т.Жанабазар, Бүгд Найрамдах Куба Улсад суух Онц бөгөөд Бүрэн эрхт Элчин сайдаар О.Дамбаасамбуу нарыг тус тус томилох тухай саналыг зөвшилцөхөөр хүргүүлснийг Ерөнхийлөгчийн ахлах зөвлөх П.Цагаан УИХ-ын дарга Д.Дэмбэрэлд өнөөдөр өргөн барив.
Ерөнхийлөгчийн ахлах зөвлөх П.Цагаан “Төрийн ажил тасралтгүй үргэлжлэх ёстой. Зарим Элчин сайд буцаж ирээд багагүй хугацаа өнгөрч байгаа ч Засгийн газар дээр дараагийн хүний нэрийг дэвшүүлэх ажил саатаж цаг алдлаа. Тиймээс энэ саналыг ойрын хугацаанд хэлэлцэн хариу өгнө үү” хэмээн Монгол Улсын Ерөнхийлөгч хүссэнийг УИХ-ын даргад уламжлав. УИХ-ын дарга Д.Дэмбэрэл ирэх долоо хоногт энэ асуудлыг хэлэлцэх боломжтойг дурьдлаа.