Монгол Улсын Ерөнхийлөгчийн Тамгын газар, Швейцарийн хөгжлийн агентлагаас Шууд ардчиллын хүрээлэнтэй хамтран “Монгол Улсад төвлөрлийг сааруулах, орон нутагт эрх мэдэл олгох, иргэний оролцоог хангах” гэсэн сэдвээр зөвлөлдөх уулзалт “Иргэний танхим”-д өнөөдөр зохион байгууллаа.
Ерөнхийлөгчийн Эдийн засгийн бодлогын зөвлөх Л.Дашдорж “Орон нутгийн эрх мэдлийг иргэдийн оролцоотой нэмэгдүүлэх нь”, Швейцарийн хөгжлийн агентлагийн хөтөлбөрийн менежер Дийпак Элмер “Засаглалыг дэмжих, төвлөрлийг сааруулах” төслийн “Орон нутгийн түвшин дэх иргэдийн оролцоо” гэсэн илтгэл тус тус тавив.
Монгол Улсын Ерөнхийлөгч Ц.Элбэгдорж энэ оны эхээр Швейцарийн хөгжлийн агентлагт шууд ардчиллыг хөгжүүлэх чиглэлээр Монголд төсөл хэрэгжүүлэхийг хүссэн юм. Энэ дагуу Швейцарийн хөгжлийн агентлаг “Засаглалыг дэмжих, төвлөрлийг сааруулах” хөтөлбөрийг Засгийн газрын болон иргэний нийгмийн байгууллагуудтай хамтран хэрэгжүүлэхээр бэлтгэж байна. 2012 оны дөрөвдүгээр сараас жилийн хугацаатай уг хөтөлбөрийг хэрэгжүүлэх бөгөөд түүний гурав дахь шат “Орон нутагт иргэдийг оролцоог нэмэгдүүлэх”-эд чиглэх аж. Ийм хөтөлбөр Филиппин, Энэтхэг, Швейцарьт хэрэгжиж үр дүнгээ өгсөн юм байна.
Оролцогчид илтгэлтэй холбогдуулан саналаа хэлж, бас асуултууд тавьж байлаа. Тэд орон нутгийн эрх мэдлийг иргэдийн оролцоотой нэмэгдүүлэхэд юу хэрэгтэй талаар олон санал хэлсэн юм. Тухайлбал оршин суугчдыг мэдээллээ стандартчлах замаар жигд тогтвортой хангах, мэдээлэл, зар түгээлтийн хариуцлагын дүрэм журмыг бий болгох, төсвийн асуудлаар баг, сум, хорооны хурлыг зохион байгуулах “туршлагатай даргалагчдыг” бэлтгэх, байгууллага бүр ямар мэдээллийг ил тод байлгах, тайлагнахыг тогтоож өгөх, төрийн хяналтын байгууллагуудын үйл ажиллагааг уялдуулах, иргэдийн оролцооны хууль эрх зүйн орчныг системчлэх, орон нутгийн төсвийн орлого, зарлагыг татвартай нь холбох, иргэдийн төсвийн боловсрол, мэдээллийн эрх чөлөө, оролцооны сонирхлыг дэс дараатай нэмэгдүүлэх, төрийн үйлчилгээний ил тод байдал, эргэх холбоо, нийгмийн хариуцлагыг дээшлүүлэх, одоогийн сумд хэтэрхий жижиг, удирдлагаа иргэд нь сонгохдоо ах дүү, танил талаараа хуйвалдан баг, сумыг нэг хоёрхон айлын эрх мэдэлд оруулж буй зэргийг бодолцон засаг захиргаа, нутаг дэвсгэрийн хуульд яаралтай өөрчлөлт оруулан томсгох, сум өөрийн дүрэмтэй байх, нийслэлд хороог сумын хэмжээний эрх мэдэлтэй болгох, орон нутгийн хөрөнгө оруулалтыг хүн амыг харгалзан хуваарилах, сумын хөгжлийн сангийн эх үүсвэрүүдийг тодорхой заах хэрэгтэй гэж ярилаа.
Ерөнхийлөгчийн Эдийн засгийн бодлогын зөвлөх Л.Дашдорж хааж үг хэлэхдээ “Төсвийн тухай хуулийн төсөл арванхоёрдугаар сард батлагдчих байх гэж бодож байна. Ингэснээр холбогдох хуулиудад өөрчлөлт оруулна. Орон нутгийн эрх мэдлийг нэмэгдүүлнэ гэдэг нь дарга нарт биш иргэдэд эрх мэдэл олгох тухай юм шүү” хэмээн онцлон тэмдэглэв.