Монгол Улсын Ерөнхийлөгч Цахиагийн Элбэгдорж 2011 оны 12 дугаар сарын 5-9-нд Кувейт Улсад албан ёсны айлчлал, 12 дугаар сарын 10-13-нд Катар Улсад ажлын айлчлал хийж, Катар Улсын Доха хотноо болох НҮБ-ын ивээл дэх Соёл иргэншлийн Холбооны 4 дүгээр форумд оролцоно. Кувейт Улсад айлчлах үеэр Монгол Улсын Ерөнхийлөгч Кувейт Улсын Эмир, Үе Залгамжлах хунтайж, Ерөнхий сайд, Үндэсний Ассамблейн дарга зэрэг албаны хүмүүстэй уулзаж, хоёр талын харилцааны болон харилцан сонирхсон асуудлаар яриа хэлэлцээ хийж, санал солилцоно.
Катар Улсад айлчлах үеэр Монгол Улсын Ерөнхийлөгч Катар Улсын Эмир, Үе залгамжлах хунтайж, Ерөнхий сайд бөгөөд Гадаад хэргийн сайд зэрэг албаны хүмүүстэй уулзаж, хоёр талын харилцааны асуудлаар яриа хэлэлцээ хийнэ.
Доха хотноо болох НҮБ-ын ивээл дэх Соёл иргэншлийн Холбооны 4 дүгээр форумд оролцож, “Хөгжлийн зорилтуудыг ургашлуулахад итгэлцлэл, хүлээцтэй хандлагыг эрхэмлэх нь” сэдэвт бүгд хуралдаан дээр үг хэлнэ. Мөн “Ардчилал ба соёл иргэншлүүдийн хоорондох нийтлэг үндэслэлийг ойлгоход ардчиллын боловсролын үүрэг” сэдэвт хуралдааныг зохион байгуулж даргална. Уг хуралдаанд 11 орны төрийн тэргүүн, хэд хэдэн орны ерөнхий сайд нар оролцоно.