Сүүлийн 9 жилийн турш манай орны гадаад худалдааны хамгийн том түнш, хамгийн том хөрөнгө оруулагч хэвээр байгаа мөнхийн хөрш Хятад улстай харилцаа, хамтын ажиллагааг улам сайжруулахын тулд өөрийн зүгээс анхаарах болно гэж Монгол Улсын Ерөнхийлөгч Ц.Элбэгдорж өнөөдөр хэллээ. Тэрээр манай улсад айлчилж байгаа Бүх Хятадын Ардын Төлөөлөгчдийн Их Хурлын Байнгын хорооны дэд дарга Сан Гуовэйг хүлээн авч уулзах үеэр ийнхүү хэлсэн юм.
“Таны айлчлал БНХАУ байгуулагдсаны 60 жилийн ой болон Монгол Хятадын хооронд дипломат харилцаа тогтоосны 60 жилийн ойтой давхцаж байна. Өнгөрсөн 6 сард Ерөнхийлөгчийн Тангараг өргөх ёслолын ажиллагаанд БНХАУ-ын дарга Ху Жинтаогийн тусгай элч төлөөлөгчөөр БХАТИХ-ын Байнгын Хорооны дэд дарга Зян Шушэнь ирж оролцож байсан нь хятадын тал манай хоёр орны харилцааг чухалчлан хүндэтгэл үзүүлсний илрэл гэж үзэж байна” гэж Ерөнхийлөгч Ц.Элбэгдорж уулзалтын эхэнд хэллээ. Тэрээр, хоёр орны харилцааг хөгжүүлэхэд парламент хоорондын харилцаа чухал үүрэгтэйг дурдаад, хоёр талын Худалдаа, эдийн засаг, ШУТ-ийн хамтын ажиллагааны Засгийн газар хоорондын комисс идэвхтэй үйл ажиллагаа явуулж байгааг сайшаалаа.
Ноён Сан Гуовэй хоёр орны харилцааг бүх талаар өргөжин хөгжиж байгааг талархан тэмдэглээд “60 жилийн өмнө бидний хооронд найрсаг харилцааны шинэ үе нээгдэж байсан билээ. Энэ харилцаа хоёр орны удирдагч нарын хүчин зүтгэлээр амжилттай хөгжиж байгааг тэмдэглэн хэлье. Одоо манай хоёр орны хооронд харилцан итгэлцэл, ойлголцлыг бэхжүүлэх нь чухал. Монгол Хятадын хооронд дипломат харилцаа тогтоосны 60 жилийн ойг тохиолдуулан харилцааны бас нэгэн шинэ үеийг нээхэд бид бэлэн байна” гээд цаашид өндөр дээд хэмжээний айлчлалуудыг тогмолжуулж, худалдаа эдийн засгийн хамтын ажиллагааг гүнзгийрүүлэн, хүмүүнлэгийн салбарт өргөн хүрээтэй хамтрах талаар тодорхой саналуудыг хэллээ. Тухайлбал, нүүрс, нефть, эрчим хүчний томоохон төслүүд дээр хамтрахад бэлэн байгаагаа илэрхийлж, аялал жуулчлал байгаль орчин, онцгой байдлын салбарт хамтын ажиллагааг өргөжүүлэх хүсэлтэй байна гэлээ. Тэрээр монгол улсад анх удаа айлчилж байгаа ч, манай орны нийгэм эдийн засгийн эрчимтэй хөгжил гүнзгий сэтгэгдэл үлдээж байна гэсэн юм. Монгол Улсын Ерөнхийлөгчийг эх орондоо айлчлахыг урьж байгаа Төрийн тэргүүнийхээ урилгыг дамжууллаа.
Ерөнхийлөгч Ц.Элбэгдорж, Бүх Хятадын Ардын Төлөөлөгчдийн Их хурлын Байнгын хорооны дэд дарга Сан Гуовэй нар 2 орны харилцааны бусад асуудлаар санал солилцлоо.